ՀՀ–ն ու Իրանը քննարկել են առևտրաշրջանառության ծավալը 3 մլրդ դոլարի հասցնելու հնարավորությունները․ Միրզոյան

Ուրախությամբ պետք է արձանագրեմ, որ Իրանի հետ ՀՀ հարաբերությունները շարունակում են զարգանալ կայուն կերպով, ինչը մեր կառավարության տարածաշրջանային քաղաքականության առաջնահերթություններից մեկն է։ Այս մասին ԱԳՆ-ում իրանցի գործընկերողջ հետ համատեղ մամուլի ասուլիսի ընթացքում հայտարարեց ՀՀ արտգործնախարար Արարատ Միրզոյանը։

Նա վստահություն հայտնեց, որ երկկողմ գործակցության խորացումը կկրի շարունակական բնույթ։

«Երկու երկրների միջև առկա տնտեսական փոխգործակցությունը շոշափելի հաջողություններ է գրանցել հատկապես վերջին տարիներին։ Կարող ենք արձանագրել, որ 2024 թվականին մեր երկկողմ առևտրաշրջանառության ծավալը գերազանցել է առնվազն նախորդ 5 տարիների ցուցանիշը և սա կարևոր արդյունք է»,– ասաց Միրզոյանը։

ԱԳ նախարարը նշեց, որ Հայաստանն ու Իրանը քննարկել են երկու երկրների միջև առևտրաշրջանառության ծավալը 3 մլրդ ԱՄՆ դոլարի հասցնելու հնարավորությունները։

Նա նշեց, որ Հայաստանի և Իրանի համար երկու պետությունների սահմանի անքակտելիությունն ունի կենսական նշանակություն։