Ինչ են քննարկել Թուրքիայի ԱԳ նախարարը և ԱՄՆ պետքարտուղարը

Թուրքիայի ԱԳ նախարար Հաքան Ֆիդանը ԱՄՆ պետքարտուղար Մարկո Ռուբիոյի հետ երեքշաբթի Վաշինգտոնում կայացած բանակցությունների ժամանակ քննարկել Է Ուկրաինայում հրադադար հաստատելու ջանքերը: Այս մասին հայտնում է Hürriyet թերթը՝ հղում անելով դիվանագիտական աղբյուրներին, գրում է Ria Novosti-ն:

«Հայտարարվել է, որ երկու կողմերն էլ հստակ արտահայտել են պաշտպանական արդյունաբերության ոլորտում համագործակցության խոչընդոտները վերացնելու իրենց քաղաքական կամքը։ Նշվել է, որ առկա խնդիրների լուծման համար կանցկացվեն տեխնիկական հանդիպումներ։ Հաղորդվում է, որ կողմերն ընդգծել են Սիրիայի վարչակազմի հետ փոխգործակցության կարևորությունը: Նաև վճռականություն են հայտնել Սիրիայում իրավիճակը կայունացնելու և ահաբեկչության դեմ պայքարելու համար», - ասվում է հաղորդագրության մեջ։

Բացի այդ, աղբյուրները նշում են, որ նախարար Ֆիդանը իր գործընկեր Ռուբիոյին ընդգծել է Գազայում կայուն հրադադարի անհրաժեշտությունը և այդ հարցի կարևորությունը տարածաշրջանային խաղաղության համար:

«Հաղորդվում է նաև, որ քննարկվել են Ուկրաինայում հրադադարի հասնելու ջանքերը», - հստակեցրել է թերթը:

«Քննարկվել են նաև ապագայում պետությունների ղեկավարների մակարդակով այցերի կազմակերպմանն ուղղված միջոցառումները։ Քննարկվել է Ադրբեջանի և Հայաստանի միջև խաղաղ գործընթացը։ Ի վերջո, ընդգծվել է, որ Բոսնիա և Հերցեգովինայի կայունությունը մեծ նշանակություն ունի բալկանյան տարածաշրջանի համար», - նշվում է նյութում։