Ռուսաստանում քննադատել են ԵՄ-ին անդամակցելու Երևանի ձգտումը․ RTVI

Մոսկվայում քննադատել են ԵՄ-ին անդամակցելու Երևանի ձգտումը և զգուշացրել դրա հետևանքների մասին։ ՌԴ նախագահի մամուլի քարտուղար Դմիտրի Պեսկովը հայտարարել է, որ Հայաստանը չի կարողանա միաժամանակ լինել և՛ Եվրամիության, և՛ Եվրասիական տնտեսական միության (ԵԱՏՄ) կազմում։ Փոխվարչապետ Ալեքսեյ Օվերչուկը նաև նշել է, որ «ԵԱՏՄ-ն և ԵՄ-ն անհամատեղելի են» և ԵՄ-ին անդամակցելը համեմատել է «Տիտանիկի տոմս գնելու հետ»։ Այս մասին գրում է RTVI-ն։

Պետդումայի ԱՊՀ հարցերով հանձնաժողովի նախագահի առաջին տեղակալ Կոնստանտին Զատուլինը RTVI-ին տված մեկնաբանությունում նշել է, որ հենց ԵԱՏՄ-ին անդամակցության շնորհիվ է, որ «Հայաստանի տնտեսությունը դոպինգ է ստացել», իսկ Եվրամիությանն անդամակցելը կնշանակի հեռանալ այդ տարածությունից։ Ռուս պատգամավորը կարծիք է հայտնել, որ Հայաստանի անդամակցությունը ԵՄ-ին «բարձր լեռներից այն կողմ է, ավելի բարձր, քան Կովկասյան լեռները», քանի որ Եվրոպան առայժմ Երևանին նման բան չի խոստացել։

«Բայց Հայաստանն արդեն սկսել է ենթարկվել Եվրամիությանը, ինչպես նաև միության առանձին անդամներին, օրինակ՝ Ֆրանսիային, որոնք բորբոքում են Փաշինյանի՝ հետխորհրդային տարածքից դուրս պրծնելու ցանկությունը»,- եզրափակել է Զատուլինը։