Պուտինը հասավ իր ուզածին՝ առանց որևէ բան զիջելու․ Sky

ԱՄՆ-ը քննարկում է որոշ սահմանափակումների թուլացման հնարավորությունը՝ ռուսական գյուղատնտեսական և պարարտանյութերի արտահանումը համաշխարհային շուկա վերադարձնելու համար: Այս մասին հայտնում է Sky News հեռուստաալիքը։

«Սա չափազանց կարևոր կետ է։ Վաշինգտոնն առաջին անգամ ավելի քան երեք տարվա ընթացքում չեղարկում է Մոսկվայի դեմ պատժամիջոցները, այլ ոչ թե սահմանում է դրանք։ Սա ԱՄՆ-ի և Ռուսաստանի միջև մերձեցման ամենավառ ապացույցն է և Դոնալդ Թրամփի՝ Վլադիմիր Պուտինին գործընկեր դարձնելու  մտադրության հստակ ազդանշան»,– ասվում է հրատարակության մեջ։

Նշվում է, որ առայժմ քննարկումը վերաբերում է միայն որոշ սահմանափակումների թուլացմանը, որպեսզի ռուսական գյուղմթերքի ու պարարտանյութի արտահանումը վերադառնա համաշխարհային շուկաներ։

Փաստորեն, ռուսական պարենային ապրանքներն ու պարարտանյութերը երբեք չեն ենթարկվել Արևմուտքի պատժամիջոցներին, սակայն արտահանումը խաթարվել է ռուսական բանկերի՝ SWIFT վճարային գլոբալ համակարգից կտրված լինելու պատճառով: Սա հանգեցրել է ավելի բարձր սակագների և վճարումների հետաձգման՝ նույնիսկ բարեկամ երկրների հետ սահմաններից առևտուր անելիս, նշում է Sky News-ը։