Փաշինյանն էլ չի ձգում ո՛չ քաղաքականապես, ո՛չ ֆիզիկապես․ «Հրապարակ»

«Հրապարակ» թերթը գրել է.

Նիկոլ Փաշինյանն էլ չի ձգում՝ ո՛չ քաղաքականապես, ո՛չ ֆիզիկապես։ Նա դա չի էլ թաքցնում, խորհրդարանի ամբիոնից ասում է, որ նյարդերը տեղի են տալիս, գլուխը ցավում է․․․ Ո՞ւմ գլուխը չէր ցավի, եթե գտնվեր նրա վիճակում՝ հեղինակազրկված, պարտված, ձախողված ե՛ւ երկրի ներսում, ե՛ւ արտաքին աշխարհում։

Փաշինյանը տապալումների մաստեր կլաս է ցույց տալիս։ Նա ձախողել է իր գլխավոր խաղաքարտը` խաղաղությունը, որով վերարտադրվել էր հայ ժողովրդի համար աղետալի հետեւանքներով պատերազմում պարտվելուց հետո։ Խաղաղությունը չի գալիս, Ալիեւը թքած ունի այդ թղթի վրա, նա կրակում է սահմանին։ ՔՊ-ն ու անձամբ Փաշինյանը քաղաքական ճգնաժամ են ապրում, նրանց վարկանիշը երկրաչափական պրոգրեսիայով նվազում է, Գյումրու ընտրություններում ձախողումը հեռու չէ, իշխանությունը, փաստացի, չի տիրապետում իրավիճակին, ու դա տեսնում են բոլորը՝ հետեւելով երկրի վարչապետի ջղաձգումներին, օրենքը խախտելու հուսահատությանը եւ անկանոն սպառնալիքներին՝ ուղղված երկրի երեք նախագահներին, իսկ լայն առումով՝ հայ ժողովրդին, որը հասկացել է, թե ինչ է կատարվում, ու ուր է տանում Փաշինյանը երկիրը։ Ինքը սկսել է հասկանալ, որ քաղաքական ու բարոյական տեսանկյունից «իզգոյ» է դարձել։ Եվ այս իրավիճակն է խորհրդարանում ղժղժոցի պատճառը։

«Ես չեմ կարող իջնել փողոցային խուժանի մակարդակին»,- «Հրապարակ»-ին ասաց ՀԱԿ փոխնախագահ Արամ Մանուկյանը, երբ խնդրեցինք արձագանքել ԱԺ-ում Փաշինյանի գոռգոռոցներին եւ կրկին բարձրաձայնած առաջարկին, թե` եկեք բանավիճեք ինձ հետ։ Առաջին նախագահի խոսնակ Արման Մուսինյանն էլ արձագանքել էր․ «Նա կկծի, կլացի, քացի կտա, կգոռա ու կսպառնա, որ կբողոքի վերին ատյաններ, կանի արդեն պատկերացնելին ու դեռեւս անպատկերացնելին: Բայց երբեք չի հրապարակի ղարաբաղյան կարգավորման՝ Մինսկի խմբի պաշտոնական պլաններն ու Հայաստանի պաշտոնական պատասխանները, այդ թվում՝ իր կողմից մերժված 2019 թվականի պլանը»: Երկրորդ նախագահի գրասենյակից Փաշինյանին հորդորել էին՝ օղին դեղերի հետ չխառնել, ու նշել, որ նա «բանավիճելու մանիակալ չբավարարված պահանջ ունի», որի «լավագույն լուծումը մոտակա հոգեբուժարանում սանիտարների հետ բանավիճելն է»: Երրորդ նախագահ Սերժ Սարգսյանի խոսքով էլ, «նշաձողից ցածր ընկածների հետ ընդունված չէ բանակցել, ուր մնաց թե՝ բանավիճել»։

ԱԺ-ում, հիշեցնենք, Փաշինյանն ինքնատիրապետումը կորցրել էր, նախկին նախագահներին սպառնացել «պատերով տալ եւ քաղաքական դիակի մնացորդները դուրս հանել», «ոտքի տակ տալ»։ Իսկ ջղաձգման հաջորդ օրն արդեն Գյումրիում գործի դրվեց ռեպրեսիվ մեքենան՝ ընդդիմադիրների նախընտրական շտաբներում ու բնակարաններում խուզարկությունների, ձերբակալությունների տեսքով։

Կառավարման հարցերով փորձագետ Հովհաննես Ավետիսյանը Փաշինյանի վարքագիծը բացատրում է արտաքին ու ներքին ճնշումների տակ հայտնվելու հանգամանքով․ մի կողմից Ալիեւն է նրան ճնշում՝ անընդհատ ավելացնելով պահանջները, մյուս կողմից՝ հայ ժողովուրդը։ «Այստեղ հենց «հայ»-ն եմ ուզում շեշտադրել, հայ ժողովուրդն է նրա նկատմամբ ճնշում գործադրել՝ չուզենալով հրաժարվել իր իրավունքներից, եւ նրա նյարդերը տեղի են տալիս։ Իր բարեկամ Ալիեւին նախորդիվ խոստում տված Արցախը չի բավարարում նրան, նա ավելին է պահանջում։ Սա էլ տեսնում է, որ հայ ժողովրդին այլեւս չի կարողանում մոլորեցնել, խաբել, հասկանում է, որ հաջորդիվ զիջումներն իր վրա շատ թանկ են նստելու»,- բացատրում է մեր զրուցակիցը: Ավետիսյանի խոսքով, Փաշինյանը քաջ գիտակցում է, որ ցածր է վարկանիշը, ու ընտրություններին, լինեն դրանք արտահերթ, թե հերթական, գործադրելու է նույն սխեման, որը հենց այս օրերին տեսնում ենք Գյումրիում։ «Ինքը հանդես է գալու իր ուժով` զուգահեռ, այսպես կոչված, եվրոպամետ ուժերով, ինչու «այսպես կոչված», որովհետեւ դրանք կեղծ են։ Նրանք զուգահեռ երկու թեզ են քարոզում՝ հակառուսականություն եւ դեպի Եվրոպա ճանապարհ,  այդ ուժերով նա փորձելու է վերարտադրվել՝ դաշինքով ԱԺ-ում ունենալ մեծամասնություն եւ մնալ վարչապետի պաշտոնին։ Իր ծրագիրը սա է, որը կարող է խափանել հայ ժողովուրդը՝ այն գիտակից հայը, որը հասկանում է, որ Փաշինյանը թուրքահպատակ է, այսինքն՝ կատարել եւ կատարելու է Թուրքիայի եւ Ադրբեջանի բոլոր ցանկություններն այնքան ժամանակ, մինչեւ հայկական պետությունը՝ որպես ազգային պետություն, վերանա»,- ասում է կառավարման փորձագետը՝ հավելելով, որ Փաշինյանի համար ստեղծված իրավիճակը փակուղային է, նա հասկանում է, որ հայ ժողովուրդը սթափվում է, ու մոտ է իր իշխանության ավարտը։

«Նա կարծում էր, որ կարողանալու է ինչ-որ պահի բավարարել Ալիեւի պահանջները, բայց տեսնում է, որ դա այլեւս անհնար է, ու, մյուս կողմից, տեսնում է, որ հայ ժողովուրդը սթափվում է։ Մենք նրա խոսույթում նույնիսկ տեսնում ենք, որ արդեն պարբերաբար կրկնում է, որ եթե հայ ժողովուրդն ուզի, ես վաղն էլ չեմ լինի Հայաստանի վարչապետ: Այսինքն, ասում է՝ եթե հայ ժողովուրդը փողոց դուրս գա եւ ինձ պարտադրի հեռանալ, ես հեռանալու եմ։ Ես կարծում եմ, որ նա անելու է դա, եւ դա լինելու է Հայաստանից փախուստի ճանապարհով, որովհետեւ ինքը գիտի, թե ինչ հանցագործություններ է գործել հայ ժողովրդի դեմ, եւ, բնականաբար, չի ցանկանում կանգնել դատարանի առջեւ, որն իր պարագայում ուղղակի անխուսափելի է»,- եզրափակում է Հովհաննես Ավետիսյանը։