Սարսափելի էր, մարդիկ բղավում էին. զբոսաշրջիկը պատմել է Բանգկոկի երկրաշարժի մասին (լուսանկարներ)

Երկրաշարժի ժամանակ Բանգկոկի առևտրի կենտրոններից մեկում դեկորացիաներ են ընկել, առաստաղը փլվել է։ Այս մասին Gazeta-ին հայտնել է ռուս զբոսաշրջիկը, ով եղել է արտակարգ դեպքի վայրում։ Աղջկա բնորոշմամբ՝ շենքի տարհանման ժամանակ մարդիկ բղավում ու վազում էին։

«Բոլորը բարձրահարկ շենքերից տարհանվել են փողոց, ամեն ինչ ժամանակավոր փակ է, սրճարանները բաց են: Այդ ժամանակ ես երրորդ հարկում գտնվող Emsphere առևտրի կենտրոնում էի, երբ սկսեց ամեն ինչ ցնցվել: Առաստաղը սկսեց քանդվել, զարդարանքները սկսեցին ճոճվել և ընկնել առաստաղից, մարդիկ գոռում էին և վազում դեպի շարժասանդուղք:

Դա ահավոր էր, սարսափելի: Դուրս եկանք ու առայժմ նստած ենք այգում։ Այստեղից հեռանալը վտանգավոր է, քանի որ շուրջը բարձրահարկ շենքեր կան, և հետցնցումներ են սպասվում, ուստի անհնար է վերադառնալ շենքեր և բնակարաններ:

Բանգկոկում բարձրահարկ շենք է փլուզվել, բայց այնտեղ կարծես մարդիկ չեն եղել։ Շատ շենքերում պատերը ճաքճքել են, խողովակներից ջուրը լցվել է շինություններ։ Ամենավատ իրավիճակն այն մարդկանց մոտ էր, ովքեր գտնվում էին բարձր հարկերում, քանի որ այնտեղ ավելի ուժեղ է զգացվել ցնցումը»,- ասել է զբոսաշրջիկը։