Մոսկվայի մարզում թմրանյութերի երկու խոշոր լաբորատորիա է փակվել (լուսանկարներ)

Իրավապահները Մոսկվայի մարզում փակել են թմրանյութերի երկու լաբորատորիա և առգրավել ընդհանուր 800 միլիոն ռուբլու ապրանք: Այս մասին Telegram-ի ալիքում հայտնել է ՌԴ ՆԳՆ պաշտոնական ներկայացուցիչ Իրինա Վոլկը։

Օպերատիվ տեղեկատվությունը ստուգելիս՝ ոստիկանները կանգնեցրել են օտարերկրյա ավտոմեքենան, որը հեռանում էր Ռամենսկի մունիցիպալ շրջանի գյուղերից մեկի տարածքից։ Բեռնախցիկի մեջ հայտնաբերվել է 4 կգ բյուրեղային նյութ։ Վարորդը և ուղևորը բերման են ենթարկվել։

Հանցագործների վարձակալած հողատարածքում գտնվող տները զննելիս՝ ոստիկանները հայտնաբերել են սինթետիկ թմրամիջոցներ արտադրող երկու լաբորատորիա։ Դեպքի վայրում հայտնաբերվել են մեծ քանակությամբ պատրաստի արգելված նյութեր, քիմիական ռեագենտներ, թմրամիջոց պարունակող հեղուկների մնացորդներ, լաբորատոր սարքավորումներ և այլ իրեր։

Խուզարկությունների ընթացքում անվտանգության ուժերը հայտնաբերել են սինթետիկ թմրանյութի 1,5 միլիոն մեկանգամյա չափաբաժին։ Բացի այդ, լաբորատորիայում հայտնաբերվել է ավելի քան 200 կգ մեֆեդրոն։ Սև շուկայի գներով՝ առգրավված թմրամիջոցների մանրածախ արժեքը կազմում է ավելի քան 800 միլիոն ռուբլի։