Իշխանությունները «ստրախովկա» են արել՝ մարդկանց դեպի Վարդան Ղուկասյան ուղղորդելով. Մարտուն Գրիգորյան (տեսանյութ)

Գյումրիի քաղաքապետի թեկնածու Մարտուն Գրիգորյանը միանշանակ քաղաքական հետապնդում է համարում երեկվանից իր թիմի և իր ընտանիքի անդամների նկատմամբ իրավապահ մարմինների կողմից իրականացվող գործողությունները՝ շեշտելով, որ նախընտրական քարոզարշավի նախավերջին օրն իր դեմ իրականացված այդ գործողությունները խոչընդոտել են իր քարոզարշավը: Այս մասին Գյումրիի քաղաքապետի թեկնածուն նշեց Euromedia24-ի հետ զրույցում՝ ընդգծելով, սակայն, որ դրանով չեն կարող իր վրա ճնշում գործադրել և դա չի կարող ազդել ընտրություններում հաղթելու իր վճռականության վրա:

Գյումրու ավագանու արտահերթ ընտրություններին մասնակցող «Մեր քաղաքը» դաշինքի նախընտրական ցուցակի առաջին համարը նաև մեկնաբանեց երեկ՝ մարտի 27-ին, Հանրային հեռուստաընկերության կողմից կազմակերպված նախընտրական բանավեճից հետո իր կողմից արված հայտարարությունը, որում Մարտուն Գրիգորյանն անդրադարձել էր Գյումրիի քաղաքապետի մեկ այլ թեկնածու՝ Կոմունիստական կուսակցությունից առաջադրված նախկին քաղաքապետ Վարդան Ղուկասյանին և ասել, որ Վարդան Ղուկասյանի անունը տալուց հետո են իր հորն ու որդուն ձերբակալել: Գրիգորյանը հայտարարել էր, որ «իշխանությունները ընդդիմադիր թեկնածուներից մեկին ուռճացնում են, արհեստական տոկոսներ են տալիս այդ թեկնածուին, որպեսզի գյումրեցին, չուզենալով այդ թեկնածուին տեսնել քաղաքապետի պաշտոնում, չգնա, Մարտուն Գրիգորյանի օգտին քվեարկի»:   Վարդան Ղուկասյանն էլ, անդրադառնալով այս խոսքերին, ասել էր, թե ինքը սպասում էր նման հայտարարության, որ իր մասին պիտի ասեն, թե իշխանություններն իրեն պաշտպանում են:

Հարցին՝ արդյոք կարծում եք, որ Վարդան Ղուկասյանը «իշխանությունների մարդն է», Մարտուն Գրիգորյանը պատասխանեց, որ իր խոսքերը սխալ են մեկնաբանվել:

«Վարդան Ղուկասյանը լավ չի հասկացել այդ ամեն ինչը և իմ խոսքը լրիվ ուրիշ ձևով է մեկնաբանել: Ես ասել եմ, որ ոչ թե մեղադրում եմ Վարդան Ղուկասյանին, այլ ես իշխանությունների մասին եմ խոսել, որ իշխանությունները ամեն ինչ անում են, ուղղորդում են մարդկանց դեպի Վարդան Ղուկասյան», - պարզաբանեց Մարտուն Գրիգորյանը:

Մանրամասները՝ տեսանյութում:

Մարտուն Գրիգորյանը ԱԺ պատգամավոր է «Պատիվ ունեմ» խմբակցությունից: Նա գլխավորում է Գյումրու ավագանու արտահերթ ընտրություններին մասնակցող «Մեր քաղաքը» դաշինքի նախընտրական ցուցակը: Երեկ՝ մարտի 27-ին, իրավապահ մարմինները խուզարկություն էին իրականացրել «Մեր քաղաքը» դաշինքի նախընտրական շտաբներում, գրասենյակներում ինչպես նաև՝ Մարտուն Գրիգորյանի տանը, որից հետո ձերբակալվել էին նրա հայրը և որդին: Քաղաքապետի թեկնածուն հայտարարել էր, որ դա ընտրությունների նախօրեին իր դեմ իրականացվող քաղաքական հետապնդում է: Հաջորդ օրը Կամո Գրիգորյանը և Կարեն Գրիգորյանը ազատ արձակվեցին, սակայն Հակակոռուպցիոն դատարանը նրանց նկատմամբ վարչական հսկողություն սահմանեց հետևյալ սահմանափակումներով՝ չշփվել վարույթով անցնող մարդկանց հետ և 20:00-08:00-ն մնալ տանը:

Արամ Սարգսյան