Վաղինակ Գալուստյանը վերընտրվել է ԵՕՀՊՄ քոլեջի տնօրենի պաշտոնում

Օրերս Վաղինակ  Գալուստյանը վերընտրվեց ԵՕՀՊՄ քոլեջի տնօրենի պաշտոնում, շնորհավորելով նրան, ամփոփեցինք պաշտոնավարման հինգ տարին՝ հինգ հարցում, ասված է Երևանի օլիմպիական հերթափոխի պետական մարզական քոլեջի ֆեյսբուքյան էջում։

Պաշտոնավարման տարիներին հանրահայտ մարզիկն ու տնօրենը ընդհանրություն գտա՞ն, ո՞րն էր Ձեր բացահայտումը, որ արեցիք։ 

Մարզական անցած ուղին օգնեց ինձ պաշտոնավարել և բարեխղճորեն իրականացնել ստանձնած պարտավորությունս։ Այս առումով ընդհանուր եզրեր գտանք․ մեկը լրացրեց մյուսին։ Աշխատանքը պայքար է, այն նմանեցնում եմ սպորտին, որտեղ կա նպատակ, նվիրում և հաղթանակ։ Լինելով քոլեջի շրջանավարտ, ապա աշխատակից՝ այդ տարիներին թերևս չեմ գնահատել ԵՕՀՊՄ քոլեջի ներուժը, չեմ պատկերացրել, որ կարող եմ այսքան կապվել վերջինիս ու սիրել։ Բացահայտեցի իմ մեծ սերը քոլեջի հանդեպ։ 

Ընդգծե՛ք մարզադպրոցի ձեռքբերումները։ Ո՞րն է այն սկզբունքը, որ կցանկանայիք, որ ամրապնդվեր մարզիկի ենթագիտակցության մեջ։ 

Ձեռքբերումները շատ են, բայց ուզում եմ կարևորել մի իրողություն․ տասնամյակներ շարունակ այս մարզադպրոցը հանրությանը հայտնի էր որպես գիշերօթիկ դպրոց։ Դա դրոշմ էր, որից մեզ հաջողվեց ձերբազատվել և արդյունավետ աշխատանքի շնորհիվ ձեռք բերել մարզաուսումնական քոլեջի համբավ։ Կարևորում եմ բարեկարգ պայմաններ, հարուստ ուսումնամարզական բազա ունենալը, ինչը նախ թույլ է տալիս մեր մարզիկների համար ստեղծել նպաստավոր միջավայր, ապա հյուրընկալել միջազգային հավաքական թիմերի, անցկացնել մրցաշարեր, կազմակերպել ուսումնամարզական ճամբարներ։

ԵՕՀՊՄ քոլեջի սանը պետք է լինի կիրթ ու կոփված․ ուսումը և սպորտը չպետք է տարանջատել։ Դրանք պետք է լինեն նույն հարթության վրա․ սա մեր ռազմավարության հենքերից մեկն է, որով ձևավորվում է հասարակության դիմագիծը։ Քոլեջի դերի կարևորության գիտակցումն է, որ պետք է ունենա յուրաքանչյուր սովորող, ինչը կնպաստի նրա մարզական և գիտակցական մակարդակի բարձրացմանը՝ հանդիսանալով կյանքի դրական ուղենիշ։ 

Հաղթանակի հիմքը պայքարն է, Ձեր սանը պատրա՞ստ է կերտել այդ հաղթանակը, և ի՞նչ է արվում նրա ազգային ինքնագիտակցությունը բարձրացնելու համար։

Ունենք 700 սովորող, պարզ է՝ բոլորը չէ, որ կդառնան Աշխարհի ու Եվրոպայի չեմպիոներ, բայց կարող են լինել կիրթ, կոփված ու դաստիարակված։ Արվում է հնարավոր ամեն բան, որ մեր շրջանավարտը դառնա երկրին պիտանի մարդ, իսկ ով կունենա պայքարի ջիղ, նա կձգտի և կհասնի գիտակցված հաղթանակի։ 
Քոլեջում կազմակերպվող գրական-գեղարվեստական միջոցառումները, հանդիպումները, պատմամշակութային վայրեր այցերը նպաստում են մատաղ սերնդի ազգային ինքնագիտակցության բարձրացմանը։

Պարոն Գալուստյան, ավարտվեց Ձեր պաշտոնավարման առաջին շրջափուլը․ ասում են՝ ամեն ավարտ սկիզբն է մի նորի․ ի՞նչ սպասենք այդ նորից։ 

Հագեցած շրջան էր․ պաշտոնավարման առաջին իսկ օրվանից մտածել և մինչ օրս մտածում եմ քոլեջը ժամանակակից դարձնելու, նյութատեխնիկական բազայով զինելու մասին։ Ի սկզբանե ուշադրությունս կենտրոնացած է եղել շինաշխատանքների վրա․ վերանորոգվել են խաղային բաց մարզադաշտերը, ծանրամարտի մարզադահլիճը, ճաշարանը, կառուցվել է երկու բաց մարզահրապարակ, նորակառույց հյուրանոցային համալիր, ընթանում է ըմբշամարտի մարզադահլիճի հիմնանորոգումը։ 

Փուլային ընթացքում է ձյուդոյի և բռնցքամարտի մարզադահլիճների վերանորոգումը, կունենանք խաղային մարզաձևերի միջազգային չափորոշիչներին համապատասխան նորակառույց մարզադահլիճ, որը կապահովի մեծ մրցաշարեր։ Կվերանորոգվի հանրակացարանի հին մասնաշենքը, որը կհյուրընկալի օտարերկրյա 100-120 մարզիկի, իսկ միջին մասնագիտական բաժնի լսարանները կապահովվեն նոր գույքով, կունենանք գիտահետազոտական, գիտամեթոդական բժշկական կենտրոն, որտեղ մարզիկները բուժվերականգնողական փուլ կանցնեն։ Այս կառույցները կամբողջացնեն քոլեջի ողջ հմայքը, կնպաստեն նրա միջազգային ճանաչմանը, բայց որ ամենակարևորն է՝ մարզական հարուստ բազան կնպաստի մեր սաների նոր հաղթանակներին։ 
Ծավալուն աշխատանք է կատարվել և կատարվում ԵՕՀՊՄ քոլեջում, որի համար մեր երախտագիտությունն ենք հայտնում ՀՀ Կառավարությանը, ԿԳՄՍ նախարարին, ՀԱՕԿ-ին, ինչպես նաև մարզական ՊՈԱԿ-ներին։

Ո՞րն է հաջողության գրավականը։

Կարևորում եմ ստանձնած պարտավորության գիտակցումը, առավել ևս, երբ այն ասոցացվում է մատաղ սերնդի դաստիարակության հետ։ Ուրախ եմ, որ մեր աշխատանքը հանրությանը հավատ է ներշնչում, սովորողների թվի աճն այդ մասին է խոսում, ուստի նրանց հուսախաբ անելու իրավունք չունենք։ ՀՀ մարզական ֆեդերացիաների և մարզադպրոցների դերը ևս մեծ է մեր աշխատանքում․ նրանց հետ սերտ համագործակցության շնորհիվ մենք ունենք մարզիկների աննախադեպ ներհոսք ՀՀ մարզերից։ Հանդիսանալով Հայաստանի հավաքական թիմերը սնուցող երակներից մեկը՝ քոլեջն ապահովում է մարզաշխարհի սերնդափոխությունը, որտեղ կոփվում ու մարզվում է մի սերունդ, որի նվաճումները փառք ու պատիվ են բերում և՛ քոլեջին, և՛ հայրենիքին, և՛ հայ ժողովրդին։ 

ԵՕՀՊՄ քոլեջի աշխատակազմը իմ հավաքական թիմն է, ես՝ մարզիչը, ինչպես պատրաստեմ, այնպես էլ կլինի արդյունքը, իսկ հաջողությունը մեր միասնության, թիմային աշխատանքում է։ Իրագործված յուրաքանչյուր ծրագիր համարում եմ հաղթանակ, որտեղ ներդրված է գիտակից միտք, անխոնջ նվիրում և անսահման սեր։