Ադրբեջանի ԱԳՆ–ն բողոքել է Ֆրանսիայի՝ տարածաշրջանում իրավիճակն «ապակայունացնող» քայլերի մասին

Հայաստանի և Ադրբեջանի մասին Ֆրանսիայի ԱԳՆ ղեկավարի հայտարարությունը զայրացրել է Բաքվին և առաջացրել Ադրբեջանի ԱԳՆ մամուլի քարտուղար Այհան Հաջիզադեի հերթական վրդովմունքը։

Նրա խոսքով՝ «անընդունելի է կասկածի տակ դնել Ադրբեջանի նկատմամբ տարածքային հավակնություններ պահպանող Հայաստանի Սահմանադրությունը փոփոխելու օրինական պահանջը, որը քննարկվում է ավելի քան երկու տարի, և դա որպես նոր պայման ներկայացնելը։ Եթե Ֆրանսիան իսկապես աջակցում է խաղաղ համաձայնագրի վաղ ստորագրմանը, ինչպես ինքն է պնդում, ապա պետք է կոչ անի Հայաստանին ձեռնարկել համապատասխան քայլեր»։

Հիշելով Ֆրանսիայի «նեոկաղութատիրության քաղաքականությունը»՝ Հաջիզադեն պահանջել է, որ «դադարեցնի խաղաղությանը չնպաստող քայլերը և զերծ մնա գործողություններից, որոնք ապակայունացնում են իրավիճակը տարածաշրջանում»։

Ավելի վաղ, Ֆրանսիայի ԱԳՆ ղեկավարը խորհրդարանում լսումների ժամանակ անընդունելի էր անվանել Ադրբեջանի նոր պահանջները Հայաստանին՝ կապված խաղաղության համաձայնագրի հետ։

«Ադրբեջանն այժմ պահանջում է վերանայել Հայաստանի Հանրապետության Սահմանադրությունը։ Այս նոր նախապայմանն անընդունելի է և ձգձգում է ստորագրումը», - Ֆրանսիայի Ազգային ժողովում լսումների ժամանակ ասել էր Ժան-Նոել Բարոն։

Ժան-Նոել Բարոն նաև ընդգծել է, որ Ֆրանսիան ուշադրությամբ հետևում է Ադրբեջանում դատվող Ղարաբաղից հայերի դատավարություններին։

«Ֆրանսիան, ինչպես նաև Եվրամիությունը, որի առաքելությունը նոր է այցելել տարածաշրջան, ուշադիր հետևում է բոլոր կամայական ձերբակալվածների իրավիճակին և կոչ է անում ազատ արձակել նրանց՝ որպես կարգավորման ընթացիկ գործընթացի մաս», - ասաց նա։

«Հարավային Կովկասը պետք է խաղաղության և բարգավաճման գոտի դառնա»,- հավելել է նա՝ ընդգծելով, որ Եվրամիությունը կարող է կատարել իր դերը «սահմանների բացմանը և այս տարածաշրջանի բացմանը նպաստելու գործում՝ ի շահ տարածաշրջանի ժողովրդի»։

«Այդ պատճառով մենք կոչ ենք անում հարգել ինքնիշխանությունը և հարգել տարածքային ամբողջականությունը (...) այս խաղաղության պայմանագրի շրջանակներում, որն այժմ պետք է ստորագրվի երկու երկրների միջև», - ասել է նա։