Մխիթար Հայրապետյանը Փարիզում ներկայացրել է Հայաստանի՝ տեխնոլոգիական կրթական միջավայր զարգացնելու տեսլականը

ՀՀ ԲՏԱ նախարար Մխիթար Հայրապետյանն այսօր այցելել է Փարիզի առաջատար ինստիտուտներից École Polytechnique և ENSTA ParisTech ինժեներական հաստատություն՝ քննարկելու Հայաստանի և Ֆրանսիայի կրթական ու գիտահետազոտական կառույցների միջև համագործակցության խորացման հնարավորությունները։ Այդ մասին նա տեղեկացրել է ֆեյսբուքյան իր էջում։

«Ներկայացրել եմ Հայաստանի տեսլականը՝ զարգացնել տեխնոլոգիական կրթական միջավայր, որտեղ կրթությունը, գիտությունը և արդյունաբերությունը փոխկապակցված են։ Քննարկել ենք համատեղ ինժեներական և գիտահետազոտական նախագծերի, տվյալագիտության, արհեստական բանականության, կիբերանվտանգության և կայուն տեխնոլոգիաների ոլորտներում նորարարական լուծումների շուրջ հնարավոր համագործակցությունը։ Կարևորվել է նաև արդյունաբերություն-կրթություն կապի խորացումը և միջազգային կրթական ծրագրերում հայ ուսանողների ու մասնագետների ներգրավումը։ Հանդիպումների արդյունքում ձևավորվել են մի շարք կարևոր պայմանավորվածություններ, որոնք հիմք կդառնան առաջիկա համատեղ նախաձեռնությունների համար»,- գրել է նա։