Նախընտրական PR-ով չընկնենք «ապահով Հայաստանի թակարդը»

Սերժ Սարգսյանը ՀՀԿ 14-րդ արտահերթ համագումարում նշեց.

«Մենք աղբանոց նետեցինք ուժի դիրքերից հանրային խոսքը... Մեր բազմաթիվ նախաձեռնություններ այսօր արդեն արդյունք են տվել»:

Սրանից մի քանի օր անց անմեղ ճանաչվեցին «Մադաղիսի» գործով 3 մեղադրյալ երիտասարդները: Ամենայն հարգանքով վերաբերվելով այս անարդարության դեմ տարիներ շարունակ պայքարող անձանց և գնահատելով նրանց ձեռքբերումները՝ այս վճիռը նախընտրական PR ակցիա չհամարելը ուղղակի կեղծավորություն կլինի: Կեղծավորություն՝ ոչ նրա համար, որ այս գործով շոշափվում է ՀԱԿ անդամ Գագիկ Ջհանգիրյանի անունը, որովհետև ինչպես ՀԱԿ անդամ Նիկոլ Փաշինյանն էր ասում՝ արդարությունն ու արդարադատությունը ոչ ստանդարտ մոտեցումներ են պահանջում, ոչ սովորական ջանքեր, և եթե նրա տրամաբանությամբ ենք շարժվում, ապա ջհանգիրյանների նմաններին իրենց արժանին մատուցելը կդառնա եզակի, բացառիկ, հուսադրող արդարություն, այլ նրա համար, որ նմանատիպ արդարությունը տեղի է ունենում Սերժ Սարգսյանի ելույթից անմիջապես հետո:

Սերժ Սարգսյանը իր ելույթում նաև նշում է.

«Մեր հավաքական կամքը դեմ հանեցինք ամենաթողության դրսևորմանը: Մենք արմատից մերժեցինք լրագրողների հանդեպ ուժի կիրառման արատավոր պրակտիկան, բացեցինք ողջ լրատվական դաշտը, վերականգնեցինք հեռուստաընկերությունների՝ եթեր ունենալու իրավունքը»:

Այսօր՝ ելույթից ընդամենը մի քանի օր անց, ԱԺ ՀՀԿ խմբակցության անդամ Մհեր Սեդրակյանը սպառնաց «Ա1+»-ի լրագրող Մհեր Արշակյանին. «Դավա՜յ, դավա՜յ, յալլա՜, կտամ ծնոտդ կպոկեմ», որից հետո լրագրողները դիմեցին ԱԺ նախագահ Հովիկ Աբրահամյանին՝ Մհեր Սեդրակյանին և Սամվել Ալեքսանյանին կարգի հրավիրելու խնդրանքով: Այս պահին, ելնելով որոշ ՀՀԿ-ականների և Բաղրամյան 26-ի հաստիքային և արտահաստիքային աշխատողների արձագանքից, նախընտրական քարոզչության շրջանակներում Մհեր Սեդրակյանը բավականին «կոշտ ապտակ» կստանա «ապահով Հայաստանի» գիծը բռնածներից: Հուսով եմ՝ լրագրողական հանրությունը խելամիտ կգտնվի և այս ամենից ոգևորվելով՝ իրեն և հանրությանը չի գցի «ապահով Հայաստանի թակարդը»:

Սևակ Մամյան