«Ժողովուրդ».67 000 դրամանոց ճարմանդ, 1 մլն-անոց շարֆեր. ինչ գնումներ են կատարել, ինչ նվերներ են ստացել իշխանությունները

«Ժողովուրդ» օրաթերթը գրում է. ««Ժողովուրդ» օրաթերթը պարբերաբար անդրադառնում է ՀՀ 2 քաղաքական դեմքերի՝ վարչապետ Նիկոլ Փաշինյանի եւ ԱԺ նախագահ Ալեն Սիմոնյանի՝ տարբեր պատվիրակությունների ընդունելությունների եւ այցելությունների ընթացքում ստացած նվերներին եւ դրանց գներին։ Հիմա էլ արձանագրում ենք, որ Ազգային ժողովի պատվիրակությունների համար ձեռք բերած նվերները ոչնչով չեն զիջում ստացած նվերներին. թերեւս՝ միայն արժեքով։

Վերջերս գրել էինք, որ Ալեն Սիմոնյանին նվիրել են 925 հարգի արծաթյա ճարմանդ (տղամարդու), որը զարդարված է եղել չեխական գրանատ քարերով։ Ճարմանդն արժեցել է 67 հազար 280 դրամ. Սիմոնյանը գումարը փոխանցել է պետությանը։

Իսկ Ազգային ժողովը պատվիրակությունների համար ձեռք է բերել շարֆեր, փողկապներ եւ թվիլիներ։

Շարֆերի արժեքներն են 14 հազար 900 դրամ, 69 հազար 900 դրամ, 45 հազար 900 դրամ եւ 59 հազար 900 դրամ։ Ձեռք է բերվել ընդհանուր առմամբ 48 շարֆ 1 մլն 25 հազար դրամով։

Փողկապն արժեցել է 59 հազար 900 դրամ. գնվել է 3 փողկապ, որոնց համար վճարվել է 179 հազար 700 դրամ։

Թվիլիներն արժեցել են 15 հազար 900 դրամ. գնվել է 4 հատ եւ վճարվել է 63 հազար 600 դրամ։

Գնման այս պայմանագիրն արժեցել է 1 մլն 268 հազար 500 դրամ»։

Առավել մանրամասն թերթի այսօրվա համարում