ԱՄՆ-ի Պետքարտուղարությունը պաշտոնանկ է արել իր աշխատակիցներին Բենղազիի զեկույցից հետո

ԱՄՆ-ի Պետքարտուղարությունը հինգշաբթի օրը հաստատել է դիվանագիտական անվտանգության հարցերով պետքարտուղարի տեղակալի պաշտոնանկության փաստը, ինչպես նաև հայտնել է գերատեսչության 3 աշխատակիցների ժամանակավոր հեռացման մասին: Այդ մասին որոշումը հայտարարվել էր Բենղազիում սեպտեմբերի 11-ին ամերիկյան հյուպատոսության վրա կազմակերպած հարձակման հանգամանքների հետաքննությանը նվիրված զեկույցի հրապարակումից հետո. տեղեկացնում է Reuters-ը՝ հղում կատարելով պետքարտուղարության պաշտոնական ներկայացուցիչ Վիկտորիա Նուլանդին:

Ավելի վաղ ԶԼՄ-ները հայտնում էին, որ գերատեսչության 3 աշխատակից ազատման դիմում է ներկայացրել Լիբիայի Բենղազի քաղաքում ԱՄՆ-ի դեսպանի և նրա 3 աշխատակիցների ողբերգական մահվան գործը հետաքննող հատուկ հանձնաժողովի զեկույցի հրապարակումից հետո: Հանձնաժողովը դեպքի ողջ պատասխանատվությունը դրել էր ԱՄՆ-ի արտաքին քաղաքականությունն իրականացնող գերատեսչության վրա՝ դիվանագետների մահվան պատճառ համարելով Պետքարտուղարության կողմից ցուցաբերված ոչ բավարար ուշադրությունն ու թերացումները Լիբիայում ԱՄՆ-ի դեսպանատնից հնչած խնդրանքներին՝ ուժեղացնել անվտանգության միջոցառումներն ու ավելացնել հյուպատոսների թիկնապահների հաստիքները:

Ըստ ԶԼՄ-ների՝ իրենց պաշտոններից հեռացվել են դիվանագիտական անվտանգության հարցերով պետքարտուղարի տեղակալ Էրիկ Բոսվելը, դեսպանատների անվտանգության հարցերով պետքարտուղարի օգնականի տեղակալ Շարլին Լեմբը և Մերձավոր Արևելքի բյուրոյի մեկ աշխատակից: Վիկտորիա Նուլանդը հայտարարել է, որ իր պաշտոններից ժամանակավորապես ազատվել է ևս 3 աշխատակից, սակայն անուններ չի նշել: