Թուրք լոբբիստները կբողոքեն 30 երկրում Հայոց ցեղասպանության հիշատակին նվիրված հուշարձանների դեմ

Թուրքիայի LOBİSAV լոբբիստական ռազմակավարական ուսումնասիրությունների կենտրոնը մտադիր է բողոքի նոտա հղել այն երկրներին, որոնք Հայոց ցեղասպանության ճանաչման բանաձև են ընդունել և իրենց տարածքում կանգնեցրել հուշարձաններ՝ ի հիշատակ այդ իրադարձության. գրում է Թուրքիայում լույս տեսնող Hristiyan gazette թերթը:

LOBİSAV-ը հիշեցնում է, որ մինչ այժմ Թուրքիայի արտաքին գործերի նախարարությունը որևէ նոտա Հայոց ցեղասպանութան մասին բանաձև ընդունած որևէ երկրի չի ուղղել: LOBİSAV-ի տարածած հայտարարության մեջ նաև նշվում է, որ Հայոց ցեղասպանության ճանաչման մասին բանաձևերը ընդունել է 22 երկիր, իսկ իր տարածքում այս իրադարձությանը նվիրված հուշարձան է կանգնեցրել 30 երկիր:

Հայտարարության մեջ նաև նշվում է, որ ընդհանուր առմամբ՝ ամբողջ աշխարհում ի հիշատակ Հայոց ցեղասպանության կանգնեցվել է 132 հուշարձան, սակայն «ներկա պահին իրավիճակը փոխվել է, և անհրաժեշտ է վերջ դնել 97-ամյա քաղաքացիական լռությանը»: