Արթուր Բաղդասարյանը Բելառուսում համաձայնագիր է ստորագրել

Պաշտոնական այցով Բելառուսի Հանրապետությունում գտնվող ԱԱԽ քարտուղար Արթուր Բաղդասարյանը հանդիպել է Բելառուսի Հանրապետության Անվտանգության խորհրդի պետական քարտուղար Լեոնիդ Մալցևի հետ:

Հանդիպման ընթացքում կողմերը քննարկել են անվտանգության ոլորտում համագործակցությանն առնչվող հարցերի լայն շրջանակ: Նեղ կազմով հանդիպմանը հետևել են ընդլայնված կազմով քննարկումներ երկու երկրների գործընկեր կառույցների պատվիրակությունների մասնակցությամբ, որի ընթացքում ստորագրվել է Հայաստանի Հանրապետության Ազգային անվտանգության խորհրդի աշխատակազմի և Բելառուսի Հանրապետության Անվտանգության խորհրդի պետական քարտուղարության միջև 2012-2013թթ. համագործակցության ծրագիրը:

Այնուհետև ԱԱԽ քարտուղար Արթուր Բաղդասարյանը հանդիպել է Բելառուսի Հանրապետության Նախագահ Ալեքսանդր Լուկոշենկոյի հետ: Փոխանցելով ՀՀ Նախագահի ջերմ ողջույնը՝ ԱԱԽ քարտուղար Արթուր Բաղդասարյանը համոզմունք է հայտնել, որ պատվիրակության այցը կլինի առավելապես արդյունավետ հայ-բելառուսական երկկողմ հարաբերությունների ամրապնդման և տարբեր ոլորտներում հետագա փոխգործակցության խորացման առումով:

Կողմերը գոհունակություն են հայտնել երկու երկրների միջև բարեկամական հարաբերությունների առկա մակարդակի կապակցությամբ և ընդգծել, որ այդ գործընկերային հարաբերությունները, ինչպես նաև դիրքորոշումների առկա ներդաշնակությունը ՀԱՊԿ և միջազգային այլ կազմակերպությունների շրջանակներում մեծապես կնպաստեն անվտանգությանն առնչվող ոլորտներում, ինչպես նաև ռազմաքաղաքական, առևտրա-տնտեսական և այլ ասպարեզներում երկկողմ համագործակցության էլ ավելի խթանմանը: Ալեքսանդր Լուկոշենկոն նշել է, որ անհրաժեշտ է ջանքեր գործադրել ապրանքաշրջանառության ծավալների մեծացման ուղղությամբ, քանի որ բավականին մեծ է երկու երկրների առկա ներուժը: Բելառուսի Նախագահն իր գոհունակությունն է հայտնել Բելառուսի Հանրապետություն կատարած այցի ընթացքում հայկական կողմի ներկայացրած տարբեր ոլորտներում երկու երկրների միջև կապերի հետագա խորացմանն ուղղված առաջարկների կապակցությամբ և պատրաստակամություն է հայտնել հայկական կողմի հետ քննարկել համագործակցության ցանկացած առաջարկ:

Հայաստանյան պատվիրակությունն այնուհետև հանդիպել է Բելառուսի Հանրապետության Ռազմարդյունաբերության պետական կոմիտեի ղեկավարության հետ: Քննարկումների առանցքում են եղել ռազմարդյունաբերության ոլորտում համագործակցության խթանմանն ուղղված հարցեր' այդ թվում հայ-բելառուսական համատեղ ձեռնարկությունների հիմնումը: Կարևորվել է ռազմատեխնիկական հարցերով հայ-բելառուսական հանձնաժողովի հոկտեմբերի նիստին ընդունված որոշումների կենսագործման անհրաժեշտությունը: Ձեռք բերված պայմանավորվածության համաձայն փետրվար ամսին Հայաստան կժամանի Բելառուսի ռազմարդյունաբերական համալիրի ներկայացուցիչներից կազմված պատվիրակությունը:

Այցի ավարտին Արթուր Բաղդասարյանն ընդունել է Բելառուս Ագրոարտ լիզինգ գործակալության գլխավոր տնօրեն Պավել Կռուպնովին: Հանդիպման ընթացքում պայմանավորվածություն է ձեռք բերվել առաջիկայում Հայաստանում բացել ընկերության ներկայացուցչությունը' Հայաստանին անհրաժեշտ սարքավորումների և գյուղտեխիկայի տրամադրման նպատակով: