Ռուբինյանը Գալուզինին տեղեկացրել է հայ–թուրքական հարաբերություններում վերջին զարգացումների մասին

Ապրիլի 18-ին հեռախոսազրույց է տեղի ունեցել ՌԴ փոխարտգործնախարար Միխայիլ Գալուզինի և Թուրքիայի հետ հարաբերությունների կարգավորման հարցերով Հայաստանի հատուկ ներկայացուցիչ, ՀՀ Ազգային ժողովի փոխնախագահ Ռուբեն Ռուբինյանի միջև։ Դրա մասին հայտնել է Ռուսաստանի արտգործնախարարությունը։

Ռուսական կողմը հաստատել է իր պատրաստակամությունը շարունակել նպաստել Երևանի և Անկարայի միջև ընդհանուր լեզու գտնելու գործընթացին, քանի որ հայ-թուրքական հարաբերությունների բարելավումը կարևոր գործոն է Հարավային Կովկասի կայունության և կայուն զարգացման համար։  Ռուբինյանը տեղեկացրել է Հայաստանի և Թուրքիայի միջև հարաբերությունների կարգավորման ոլորտում վերջին զարգացումների մասին։

Քննարկվել են ռուս-հայաստանյան հարաբերությունների մի շարք հարցեր, ինչպես նաև Հարավային Կովկասի տարածաշրջանում փոխգործակցությունը, այդ թվում՝ 3+3 տարածաշրջանային համագործակցության պլատֆորմի (Ադրբեջան, Հայաստան, Վրաստան գումարած Ռուսաստան, Իրան, Թուրքիա) շրջանակներում։

Կարծիքների փոխանակումը տեղի է ունեցել կառուցողական մթնոլորտում։