Իսրայելը չի համարձակվի հարվածել Իրանին առանց Թրամփի աջակցության. FT

Իսրայելի ղեկավարությունը չի համարձակվի հարվածել Իրանի միջուկային օբյեկտներին՝ չունենալով ԱՄՆ նախագահ Դոնալդ Թրամփի անմիջական հավանությունն ու աջակցությունը: Այս մասին գրում է բրիտանական Financial Times թերթը՝ վկայակոչելով հարցված իսրայելցի և արաբ դիվանագետներին։

Նրանց կարծիքով՝ Իսրայելը զերծ կմնա ռազմական գործողություններից առանց Սպիտակ տան աջակցության՝ վախենալով «զայրացնել» Թրամփին և զրկվել նրա աջակցությունից, ինչպես նաև ելնելով նրանից, որ առանց ԱՄՆ-ի մասնակցության սեփական հարվածներն Իրանին շատ սահմանափակ ազդեցություն կունենան: Ընդ որում, Թրամփն ինքը ներկայումս կենտրոնացած է իրանական միջուկային ծրագրի հարցերի կարգավորման դիվանագիտական ուղիների որոնման վրա:

ԱՄՆ նախագահը, ինչպես նշում է պարբերականը, չի ենթարկվում Իսրայելի վարչապետ Բենյամին Նեթանյահուի ճնշմանը, որը ձգտում է Վաշինգտոնից ավելի վճռական և ագրեսիվ գործողությունների հասնել: Ինչպես նշում են թերթի աղբյուրները, Նեթանյահուն փորձել է համոզել Թրամփին աջակցել Իրանի միջուկային օբյեկտներին ռազմական հարվածներին դեռ նախագահի երդմնակալությունից առաջ, սակայն այդպես էլ ցանկալի արդյունքի չի հասել: