Սիրիայի պատերազմում հաղթողներ չեն լինելու. Լավրով

Վերջին շաբաթվա ընթացքում համաշխարհային ԶԼՄ-ների ուշադրությունը բևեռվել էր Ռուսաստանում կատարվող իրադարձությունների վրա` պայմանավորված «Մագնիտսկու ցուցակի» ընդունումով, ԵՄ-Ռուսաստան փոխհարաբերություններով, ՀԱՊԿ անդամ պետությունների ղեկավարների հերթական նիստի գումարման հանգամանքով, ինչպես նաև Սիրիայի հարցում Ռուսաստանի ընդունած դիրքորոշումով: Ի թիվս այլ հարցերի՝ ՌԴ արտգործնախարար Սերգեյ Լավրովն անդրադարձ է կատարել Սիրիայի հակամարտության և դրա հնարավոր ելքին. գրում է «Ինոսմին»-ը:

«Ես կարծում եմ, որ այս փուլում առավել իրատեսական է այն դիրքորոշումը, որն առաջարկում է հակամարտող երկու կողմերին անհապաղ դադարեցնել ռազմական գործողությունները և սկսել բանակցություններն առանց նախապայմանների: Մենք նման դիրքորոշում էինք ընդունել հենց սկզբից: Մենք աշխատում ենք և՛ Ասադի ռեժիմի, և՛ ընդդիմության բոլոր խմբավորումների հետ՝ առանց բացառության: Մեր արևմտյան գործընկերները, ցավոք սրտի, իրենց խաղադրույքը կատարում են բացառապես ընդդիմության հաղթանակի վրա և պնդում են, որ բանակցությունները հնարավոր են միայն Բաշար Ասադի հրաժարականի դեպքում»,-լրագրողին տված իր հարցազրույցում ասել է Սերգեյ Լավրովը:

Պատասխանելով այն հարցին, թե դիտարկում է արդյոք Ռուսաստանը Բաշար Ասադի պարտությունը, Լավրովը մասնավորապես նշել է. «Այս պատերազմում հաղթողներ չեն լինելու: Պատերազմն ընթանում է փոխոչնչացման նպատակով: Այժմ սարսափելի բաներ են կատարվում պաղեստինյան փախստականների ճամբարում: Հակամարտող կողմերը փորձում են փաղեստինցիներին ներքաշել այդ ներքին կոնֆլիկտի մեջ: Պաղեստինցիներն իրենց հերթին պառակտված են: Նրանց մի մասը ռեժիմի կողմնակից է, մյուս մասը հանդես է գալիս ընդդիմության աջակցությամբ, ընդ որում՝ ընդդիմության այս կամ այն խմբավորման աջակցությամբ: Այս պատերազմն ավելի ու ավելի է խորանում՝ ներքաշելով արդեն բնակչության ամենատարբեր խավերին:

Այս պատերազմում հաղթողներ չեն լինելու: Ես կարծում եմ, որ բոլորն են դա հասկանում: Սակայն մեկ անգամ հայտարարելով, թե բանակցությունները հնարավոր են միայն Ասադի հեռանալուց հետո՝ մարդիկ այժմ իրենք իրենց այնպիսի փակուղի են մտցրել, որ չեն կարողանում ելք գտնել: Սա պատերազմ է մինչև վերջնական հյուծում, երբ պայքարելու ուժեր այլևս չեն մնա: Պատմությունը գիտի նման դեպքեր, սակայն դրան ոչ մի լավ բանով չեն ավարտվել»,-եզրափակել է Լավրովը: