«Ես եմ հայրենիքիս զինվորը, ես եմ ծաղիկն այս հողի»

««Ես եմ» հայրենասիրական ֆիլմը նվիրված է բանակի կայացման 20–ամյակին։ Ֆիլմի նպատակն էր ստեղծել գեղեցիկ կինո, պոզիտիվ հեքիաթ, որտեղ միշտ սերն է հաղթում»,- լրագրողների հետ հանդիպման ժամանակ ասաց Երևանի կինոյի և թատրոնի պետական ինստիտուտի ռեկտոր Արմեն Մազմանյանը։ Նա ֆիլմը բանակին նվիրված կարևոր միջոցառումներից մեկն է համարում։

Նա հավելեց, որ ֆիլմը երիտասարդ սերնդին ուղղված հաղորդագրություն է, որի միջոցով փորձում են հաստատել գեղեցիկի և սիրո հաղթանակը։

«Սահմանից այս կողմ ես թշնամի չունեմ։ Ես եմ հայրենիքիս զինվորը, ես եմ ծաղիկն այս հողի։ Սա է ֆիլմի հաղորդագրությունը, և լինի գեներալ, սովորական շարքային քաղաքացի, թե օլիգարխ, բոլորը պետք է ասեն՝ ես եմ», – նշեց Արմեն Մազմանյանը։

Նա հավելեց, որ բոլորս պետք է գիտակցենք, որ թշնամին մեր մեջ չէ, այլ՝ մեզնից դուրս։

«Սակայն հանդիսատեսը շատ պասիվ է. այսօր փչացրել ենք հանդիսատեսին և նրա ընկալման եզրերը։ Այսօր միայն մերկ ոտքերի և ոչ պատշաճ հումորի պահանջարկ կա, ուստի մենք հանդիսատեսին կրթելու խնդիրներ ունենք», – նկատեց նա։

Ֆիլմը եղել է 2012–ի առաջին պրեմիերան։ Ֆիլմում նկարահանվել են Սոս Սարգսյանը, Եվա Ղազարյանը, Գնել Ուլիխանյանը։ Սցենարի հեղինակները և ռեժիսորներն են «32 ատամ» production–ից Վահագն Գրիգորյանը և Կարեն Բաբաջանյանը, ինչպես նաև Խաչատուր Առաքելյանը։ Պրոդյուսերներն են Կարեն Բաբաջանյանը և Արմեն Մազմանյանը։