«Ղազախստանի խորհրդարանական ընտրությունները հեռու են ժողովրդավարությունից». ԵԱՀԿ դիտորդական առաքելություն

«Ղազախստանում կիրակի օրն անցկացված խորհրդարանական ընտրությունները չեն համապատսախանում ժողովրդավարության հիմնարար սկզբունքներին», – ասված է Եվրոպայի անվտանգության և համագործակցության կազմակերպության (ԵԱՀԿ) դիտորդական առաքելության հայտարարությունում։ 

Հայտարարության մեջ նշվում է, որ պետք էր ընտրություններին ավելի շատ հնարավորություններ տրվեին ընդդիմադիր կուսակցություններին։

«Եթե Ղազախստանն իսկապես լուրջ նպատակ ունի խորհրդարանում ընդդիմադիր կուսակցությունների թիվն ավելացնելու հարցում, ապա իշխանությունները պետք է ավելի շատ ընդդիմադիր կուսակցությունների թույլ տային ընտրություններին մասնակցելու իրենց մասնակցությունը ցուցաբերելու համար», – հայտարարել է ԵԱՀԿ հատուկ համակարգող Ժոաո Սուարեշը։ 

Մի քանի ընդդիմադիր կուսակցությունների չեն թույլատրել քվեարկությանը մասնակցել, իսկ մի քանի թեկնածուների էլ առանց իրավական հիմնավորման չեն թույլատրել գրանցել իրենց թեկնածությունը։ ԵԱՀԿ դիտորդները ընտրությունների կազմակերպման և անցկացման աշխատանքները բարձր են գնահատել, սակայն ձայները հաշվելու գործընթացը չի եղել թափանցիկ։

Ղազախստանի Ազգային սոցիալ–դեմոկրատական կուսակցությունը «Ինտերֆաքս»–ին հայտնել է, որ իրենք ունեն տեսաժապավեններ, որոնք փաստում են քվեարկության ժամանակ ընտրատեղամասերում «կարուսել» կիրառելու դեպքերը։

Հիշեցնենք, որ հունվարի 15–ին Ղազախստանում անցկացված խորհրդարանական ընտրությունների նախնական արդյունքներով խորհրդարան են անցել իշխանամետ երեք կուսակցությունները՝ «Նուր Օտան» 80%, «Ակ Ժոլ» և Ազգային կոմունիստական կուսակցությունները։