Ինչ ազդեցություն ունի «Թրամփի էֆեկտը» մարդու իրավունքների վրա

Ամբողջ աշխարհում մարդու իրավունքների հետ կապված իրավիճակը վատթարանում է ԱՄՆ նախագահ Դոնալդ Թրամփի նախագահության առաջին օրերից սկսած․ ճգնաժամն այս ոլորտում խորացել է: Այս մասին ասվում է Amnesty International միջազգային իրավապաշտպան կազմակերպության՝ 150 երկրներում մարդու իրավունքների վիճակի մասին ամենամյա զեկույցում:

«Մարդու իրավունքների վիճակն աշխարհում» զեկույցում խոսվում է կլիմայական ճգնաժամի հետ կապված աճող անգործության, այլակարծության դեմ բռնաճնշումների, զինված հակամարտությունների սրման և միգրանտների, փախստականների, կանանց, աղջիկների և ԼԳԲՏ անձանց իրավունքների ապահովման ոլորտում հետընթացի մասին ամբողջ աշխարհում:

Իրավապաշտպանների կարծիքով՝  «Թրամփի էֆեկտը» խորացրել է «2024 թվականի ընթացքում այլ համաշխարհային առաջնորդների հասցրած վնասը» և զրոյացրել մարդու համընդհանուր իրավունքների ապահովման և առաջխաղացման տասնամյակների աշխատանքը: Մարդկությունն ավելի մոտ է հայտնվել նոր դարաշրջանին, որը բնութագրվում է «ավտորիտար գործելակերպի և կորպորացիաների ագահության խառնուրդով», ասված է զեկույցում: