Ալեն Սիմոնյանը ՌԴ–ին մեղադրել է Հայաստանի դեմ «հիբրիդային պատերազմի» մեջ

ՀՀ ԱԺ նախագահ Ալեն Սիմոնյանը ճեպազրույցում «հյուսիսային հարևանին» մեղադրեց Հայաստանի դեմ տարվող հիբրիդային պատերազմի մեջ։

Ճշտող հարցին, թե խոսքը Ռուսաստանի մասին է, ԱԺ նախագահը դրական պատասխան է տվել։

Նրա խոսքով՝ Հայաստանի դեմ իրականացվում է հիբրիդային պատերազմ, այն պարբերաբար ակտիվանում է, դրանում գործադրված են ոմն ռուս փորձագետներ հայկական ազգանուններով, փորձում են «փոխել իշխանությունը», հանրահավաքներ հայտարարել եւ այլն։

«2026 թվականին դա ավելի է ակտիվանալու և չեմ վախենում բարձրաձայնել, որ հակառակ ազդեցությունն է ունենալու և գործող իշխանության X վարկանիշը կրկնապատկվելու է։ Ես որևէ մեկի կողմից հեղաշրժման վտանգ չեմ տեսնում, վստահում եմ ՀՀ ժողովրդին»,– ասաց ԱԺ նախագահը։

Նրա խոսքով՝ նման նպատակներ դրվել են դեռ 2020-ից, եւ բոլորն՝ անարդյունք։

Հարցին, թե ինչու Նիկոլ Փաշինյանն անցանկալի է ՌԴ-ի համար, Սիմոնյանը զարմացել է. «Ինչո՞ւ է անցանկալի։ Մեզ հակառակն են ասում»։

Վերադառնալով հիբրիդային պատերազմի պատճառներին՝ ԱԺ նախագահը հայտնել է, որ բոլորին չէ, որ դուր է գալիս Հայաստանի ինքնուրույնությունը։ «Նրանց կարծիքով՝ Հայաստանը միշտ պետք է կախված լինի մի ինչ-որ կենտրոնից, ավագ եղբայր ունենա եւ մտածի, որ առանց ավագ եղբոր կամ գերտերության նրան կուտեն, իսկ իր գոյությամբ նա պարտական է նրան»։