Ադրբեջանի և Թուրքիայի ԱԳՆ պատվիրակությունների հանդիպմանը քննարկվել է նաև ԼՂՀ հարցը

Դեկտեմբերի 21-ին Բաքվում տեղի է ունեցել հանդիպում Թուրքիայի և Ադրբեջանի ԱԳ նախարարների պատվիրակությունների միջև: Այս մասին հաղորդում է News.az լրատվական կայքը:

Ադրբեջանական պատվիրակությունը գլխավորել է ԱԳ նախարարի տեղակալ Խալաֆ Խալաֆովը, իսկ Թուրքիայի կողմից՝ ԱԳ նախարարի տեղակալ Ֆաթիհ Ջեյլանը:

Խալաֆովը նշել է, որ երկու պետությունների հետաքրքրությունները նույնն են տարածաշրջանում: Նա նաև կարևորել է Թուրքիայի օժանդակությունը ԼՂՀ հարցի լուծման համար` նշելով նրա ուղղակի ազդեցությունը կարգավիճակի փոփոխության համար:

Նա նշել է, որ Հայաստանը հակակառուցողական դիրքորոշում է որդեգրել Մինսկի խմբի ԵԱՀԿ բանակցությունների մեջ, նաև ավելացրել, որ տարածաշրջանում կայունության գլխավոր խոչընդոտը ԼՂՀ հարցի շուրջ Հայաստան-Ադրբեջան կոնֆլիկտն է: Նա նաև շեշտել է, որ Հայաստանը պետք է հեռացնի իր զինված ուժերը Ադրբեջանի օկուպացված տարածքներից:

Այստեղ կարևոր է նշել, որ Ադրբեջան և Թուրքիա հարաբերությունները գնալով ամրապնդվում են, և որ երկուսի հետաքրքրությունները այս տարածաշրջանում համընկնում են: Ադրբեջանը փորձում է ցույց տալ, որ հակառակ իրական պատկերի՝ Հայաստանն է որդեգրել ոչ կառուցողական և ագրեսիվ դիրքորոշում Ղարաբաղի հարցում: Հենց այս պատճառով է, որ նա խոչընդոտում և չի ցանկանում, որ Եվրամիության կամ այլ միջազգային կառույցների ներկայացուցիչներ այցելեն այդ տարածաշրջան:

Հիշեցնենք, որ Ադրբեջանը բացատրություն էր պահանջել Հարավային Կովկասում ԵՄ հատուկ ներկայացուցիչ Ֆիլիպ Լեֆորից ԼՂՀ այցելության համար: