«Հրապարակ». Ապարանյան կլանը որոշել է այս ընտրություններին Խաչատրյան Լյովային փոխարինել Վրեժ Մարկոսյանով

Թերթը գրում է. ««Ես հիմա հստակ որոշել եմ և առաջադրելու եմ իմ թեկնածությունը», - երեկ մեր թղթակցին հայտնել է «Տիգրան Մեծ» տպարանի տնօրեն Վրեժ Մարկոսյանը, որն իր առաջադրման վերաբերյալ վերջերս մեզ հայտնել էր, թե ոչ թե ինքը, այլ իր մտերիմ շրջապատն է ցանկանում, որ առաջադրվի: Խոսքն Ապարանի թիվ 14 ընտրատարածքի մասին է, որտեղից պատգամավոր է դարձել Լյովա Խաչատրյանը: Վերջինս, ի դեպ, մեր թղթակցի հետ զրույցում նկատել էր, թե Մարկոսյան Վրեժը գալիս է «իր ընկերոջ տեղը»: Նկատի ունի՝ իր փոխարեն: Եվ «ինքը պետք է որոշում կայացնի, այլ ոչ թե իր փոխարեն»: Հիշեցնենք, որ, ըստ խոսակցությունների, ապարանյան կլանը՝ ՀՀ գլխավոր դատախազի գլխավորությամբ, որոշել է այս ընտրություններին Խաչատրյան Լյովային փոխարինել Մարկոսյանով: Իսկ Դուք Ձեր ընկերոջ հետ զրուցե՞լ եք, ասե՞լ եք, թե ինչու եք նրա դեմ դուրս գալիս, երեկ հետաքրքրվել է մեր թղթակիցը Մարկոսյանից. «Ոչ, դրա կարիքը չեմ տեսնում: Ինչ անենք՝ ընկերն էլի ընկեր կմնա, դրա մեջ վատ բան չեմ տեսնում»: Այսինքն, Դուք չեք առաջադրվում միայն նրա համար, որ ուզում են Խաչատրյան Լյովային խաղից հանե՞ն: «Ոչ, ոչ, ես առաջադրվում եմ միայն, որ իմ ժողովրդին պիտանի լինեմ», - պատասխանել Մարկոսյանը»: