«Ժողովուրդ». 34 մլն դրամ ջազի միջազգային օրվա առթիվ. որքան գումար է ծախսվել միջոցառման համար եւ ինչպես

«Ժողովուրդ» օրաթերթը գրում է. «Ապրիլի 30-ին Երևանի սրտում՝ «Կասկադում», ջազի միջազգային օրը նշվեց բացօթյա միջոցառմամբ՝ միավորելով ջազի սիրահարներին։
«Ժողովուրդ» օրաթերթը պաշտոնական աղբյուրներից տեղեկացավ, որ այս միջոցառումն անցկացնելու համար Երևանի քաղաքապետարանը քաղաքային բյուջեից հատկացրել է 34 մլն 433 հազար դրամ` մոտ 90 հազար ԱՄՆ դոլար:

Երեկոյան` ժամը 19:00-ից սկսած, հարյուրավոր մարդիկ հավաքվել էին վայելելու հայաստանյան լավագույն ջազ երաժիշտների և խմբերի ելույթները: Ելույթ էին ունեցել Լևոն Մալխասյանը, Արտո Թունջբոյաջյանը, Հայաստանի պետական ջազ նվագախումբը, Արտյոմ Մանուկյանը, Վահագն Հայրապետյանը ու շատ ուրիշներ։

Պայմանագրով նախատեսված է եղել 5-6 ժամ տևող միջոցառման համար կառուցել բեմ, ելույթներին առնչվող յուրաքանչյուր դետալ և կազմակերպչական հարց պլանավորված է եղել պայմանագրով։
Պայմանագրի մյուս կողմը՝ մատակարար «Ջազի հայկական ասոցիացիա» ՀԿ-ն, ապահովել է լուսային, ձայնային տեխնիկան, ինչպես նաև լեդ էկրանները։

Հարկ է նշել, որ Երևանի քաղաքապետարանը մեծ տեղ է տալիս սոցիալական հարթակներում բլոգերների կողմից միջոցառումների հանրահռչակմանը։ Մասնավորապես, նշված միջոցառման համար Երևանի քաղաքապետարանը միջոցառման իրազեկման, հանրահռչակման և գովազդի համար դիմել է բլոգերների և ինֆլուենսերների` մասնավորապես «Կամո բլոգին», Արմինե Հարությունյանին, Հայկ Մկրտչյանին, Մանե Գրիգորյանին և Շուշան Ստեփանյանին։

Եթե միջոցառման կազմակերպման ծախսերը համեմատենք նախորդ տարիների հետ, ապա կարձանագրենք, որ 34 մլն դրամը դեռ նորմալ է։ 2024 թվականին այս միջոցառման կազմակերպման ծախսերը կազմել էին 39 մլն 774 հազար դրամ, 2022 թվականին՝ 30 մլն դրամ։

«Ջազի հայկական ասոցիացիա» ՀԿ-ն կազմակերպել էր նաև Երևանի միջազգային լուսանկարչության փառատոնը, որի համար ծախսվել էր 50 մլն 55 հազար դրամ»։