«Չորրորդ ինքնիշխանություն». Սամ սեբե ռեժիսոր

Թերթը գրում է. «Տարիների փորձը ցույց է տալիս, որ մենք երբեմն ստիպված ենք լինում մեր դերակատարումը տեսնել նաեւ որպես ընդդիմադիր... երբեմն ինքներս ենք այդ դերը կատարում», հայտարարել է ՀՀԿ փոխնախագահ Գալուստ Սահակյանը:

«ՉԻ»- Սա արդեն հիշեցնում է այն անեկդոտը, որտեղ ծնողներին սպանած հանցագործը դատարանի դահլիճում խնդրում է իր նկատմամբ մեղմ վճիռ կայացնել, որովհետեւ ինքը երկկողմանի որբ է: ՀՀԿ-ն, փաստորեն, հնարավոր եւ անհնար բոլոր ձեւերով անում է ամեն ինչ, որպեսզի խորհրդարանում հանկարծ լուրջ ընդդիմություն չլինի, հետո էլ դժգոհում է, թե երբեմն ինքներս ենք ստիպված լինում ընդդիմության դերը կատարել:

Բայց ուշադրություն դարձրեք՝ Գալուստ Սահակյանն, ինչպես միշտ, ծայրաստիճան անկեղծ է: Նա չի ասում՝ «ընդդիմություն ենք», նա ասում է՝ «դեր ենք կատարում»: Որպես կանոն՝ տեսախցիկների առջեւ: Ճիշտ այնպես, ինչպես միջնադարյան թատրոններում, որտեղ կանանց արգելված էր խաղալ, եւ կանանց դերերը նույնպես տղամարդիկ էին խաղում: Իսկ թե ինչու ՀՀԿ-ն չի ցանկանում, որ նորմալ խորհրդարան ձեւավորվի՝ նույնպես հասկանալի է. նրանց թատրոն է պետք, եւ ոչ թե օրենսդիր մարմին: «Քասթինգը» նախագահականը կիրականացնի, սցենարը կառավարությունից կուղարկեն, եւ թամաշան ապահովված է»: