«Հայկական ժամանակ». Մի կպիր, որ չկպցնես

«Թերթի նախորդ երկու հրապարակումներից հետո, շաբաթ օրը երեկոյան համացանցում լուր տարածվեց, թե ՀՀ ոստիկանության պետ Վովա Գասպարյանի ավտոմեքենայի դիմապակուն ԱՊՊԱ կտրոն է հայտնվել: Այս տեղեկությունը մեր թղթակցի հետ զրույցում ևս մեկ անգամ հաստատել է ՀՀ ոստիկանության հասարակայնության հետ կապերի և լրատվության վարչության պետ Աշոտ Ահարոնյանը: Հիշեցնենք, որ Գասպարյանի ավտոմեքենայի դիմապակուն ԱՊՊԱ կտրոնի բացակայության խնդրին անդրադարձել էինք «ՀԺ»-ի ուրբաթ և շաբաթ օրերի համարներում: Աշոտ Ահարոնյանն ասել է, թե ոստիկանապետը արձագանքել է հրապարակումներին և Ճանապարհային ոստիկանության 1-ին գումարտակի տեսուչի կողմից վարչական իրավախախտման արձանագրություն է կազմվել վարորդի՝ Գագիկ Զոհրաբյանի վերաբերյալ: «Ոստիկանության պետը պարզապես չէր նկատել, որ ԱՊՊԱ կտրոնը ժամանակին չի փակցվել համապատասխան տեղում, ինչի համար ներողամտություն է հայցում և գոհունակություն հայտնում լրագրողների օպերատիվ աշխատանքի կապակցությամբ, ինչը հնարավորություն է տվել արագ շտկել վրիպումը», - նշել է Ահարոնյանը: «Ուրախալի է, որ մեր հասարակությունն ուշադիր է նույնիսկ նման թերացումների հանդեպ, ուրեմն՝ բարեփոխումներն արդեն արդյունք են տալիս», - հայտնել է Ահարոնյանն ու փոխանցել Գասպարյանի խոսքերը. «Ինչպես ասում են՝ Աստված իմ արդարությամբ թող ինձ դատի, իսկ ձեր արդարությամբ՝ թող ձեզ ների ու ողորմա»:

ԱՊՊԱ-ի պատմության հետ կապված հավելյալ մեկնաբանությունների կարիք չկա, թող ընթերցողը նորից կարդա մեր հրապարակումները, դրանք համադրի ոստիկանական արդարացումների հետ և իր համար ավելին կպարզի, քան դա ցանկանում են ՀՀ ոստիկանությունում: Այս թեմային կրկին անդրադառնալը համարում ենք անիմաստ: Ոստիկանապետին, սակայն, խորհուրդ ենք տալիս ժուժկալ գտնվել Աստծո անունը տալիս: Ավելի ճիշտ՝ ոչ թե մենք ենք խորհուրդ տալիս, այլ Աստվածաշունչն է այդպես պատվիրում:

Ստորև հատուկ Վովա Գասպարյանի համար մեջբերում ենք Ելք-ի 20/7-րդ համարը. «Քո տեր Աստծու անունը զուր տեղը չպիտի արտասանես, որովհետև Տերը արդար չի համարում նրան, ով իր անունը զուր տեղն է արտասանում»»,– գրում է թերթը: