Ռուսաստանի տնտեսությունը շատ ավելի խոցելի է, քան ցույց է տալիս Մոսկվան

 Ռուսաստանի տնտեսությունը գնալով ավելի փխրուն է դառնում՝ ուկրաինական պատերազմի պատճառով սահմանված արևմտյան պատժամիջոցների և երկրի ռազմատնտեսական ռեժիմին անցման հետևանքով։ Այս մասին նշվում է Եվրոպական միության ֆինանսների նախարարների համար պատրաստված Ստոկհոլմի անցումային տնտեսությունների ինստիտուտի (SITE) զեկույցում։  Զեկույցում նշվում է, որ տնտեսության մակերեսային կայունությունը պահվում է ռազմական բյուջետային խթանմամբ, սակայն դա իրականացվում է փակ, ոչ թափանցիկ մեխանիզմներով, խեղաթյուրված ռեսուրսների բաշխմամբ և նվազող ֆինանսական պահուստներով, ինչը երկարաժամկետ հեռանկարում այն անկայուն է դարձնում։

 

Հատկապես կասկածի տակ է դրվել Ռուսաստանի հրապարակած տնտեսական վիճակագրությունը՝ ներառյալ ՀՆԱ-ի և գնաճի տվյալները։ Զեկույցում նշվում է, որ եթե գնաճը իսկապես 9-10% է, ապա Կենտրոնական բանկի 21%-անոց հիմնական տոկոսադրույքը տրամաբանական չէ :  «Սա հստակ ցուցում է, որ իրական գնաճը շատ ավելի բարձր է, իսկ իրական ՀՆԱ-ի աճը՝ ուռճացված», — ասել է տնտեսագետ Թորբյորն Բեքերը։

 

Բեքերը նաև նշել է, որ իրականում Ռուսաստանի բյուջետային դեֆիցիտը կարող է լինել քառորդից կրկնակի ավելի, քան պաշտոնական 2%-ը։ Ռազմական ծախսերի զգալի մասն ուղղվում է բանկային համակարգով, ինչը բարձրացնում է ֆինանսական ռիսկերն ու կարող է հանգեցնել բանկային ճգնաժամի։ Եվրոպական հանձնակատար Վալդիս Դոմբրովսկիսն ընդգծել է՝ ԵՄ-ն համաձայն է զեկույցի եզրակացության հետ, որ Ռուսաստանի տնտեսությունը «գերագնահատված է» և գնալով ավելի խոցելի է դառնում, փոխանցում է Reuters-ը։