Ճապոնիան քննարկում է սուբսիդիաներ Tesla-ի լիցքավորման կայանների համար

Ճապոնիան կարող է սկսել սուբսիդավորել Tesla-ի Supercharger լիցքավորման կայանների կառուցումը՝ ի պատասխան ԱՄՆ-ի բողոքների, որոնք բարձրացվել են մաքսային բանակցությունների ընթացքում, հայտնում է TBS-ը։ Այժմ ճապոնական կառավարությունը աջակցություն է տրամադրում միայն CHAdeMO ստանդարտով կայանների համար, որը տեղական մշակման արդյունք է։

 

ԱՄՆ Առևտրի ներկայացուցչի գրասենյակը (USTR) կոչ է արել վերանայել այդ քաղաքականությունը՝ պահանջելով հավասար պայմաններ։ Բանակցությունների նոր փուլը հնարավոր է սկսվի արդեն հաջորդ շաբաթ՝ Ճապոնիայի գլխավոր բանակցող Ռյոսեյ Ակազավայի հնարավոր այցով Վաշինգտոն։

 

Միևնույն ժամանակ, Nikkei-ն հաղորդում է, որ Տոկիոն պատրաստ է քննարկել ԱՄՆ-ի սահմանած բարձր մաքսատուրքերի՝ մասնավորապես ավտոմեքենաների և ավտոպահեստամասերի վրա դրված 25%-անոց տուրքի նվազեցումը՝ չնայած նախկինում պնդում էր դրանց ամբողջական վերացման անհրաժեշտությունը, հայտնում է  Reuters-ը։