Հնդկաստանում 26-ամյա փեսացուն մահացել է հարսանեկան ծեսերի ժամանակ

Հնդկաստանում տղամարդը մահացել է իր զարմուհու հետ ամուսնական արարողության ժամանակ, հայտնում է Navbharat Live-ը։

Միջադեպը տեղի է ունեցել Հնդկաստանի Կարնատակա նահանգում՝ բանկի 26-ամյա աշխատակից Պրավին Կուրնեի հետ։ Տղան վատ է զգացել, երբ իր հարսնացուին հագցրել է մանգալսուտրան՝ խորհրդանշական վզնոցը, որը կրում են ամուսնացած հինդու կանայք: «Մանգալյա Դհարանամ» հայտնի հարսանեկան ծեսի ժամանակ նրա ձեռքերն ու ոտքերը սկսել են դողալ։

Այդուհանդերձ, նորապսակները կանգնել են բեմի վրա՝ օրհնություն ստանալու և լուսանկարվելու։ Բայց այդ պահին Պրավինը սրտի կաթված է ստացել, ընկել է ու 15 րոպե անց մահացել։ Ականատեսների վկայությամբ՝ նա գանգատվել է կրծքավանդակի ուժեղ ցավերից։

Պրավինի հարազատները նրան անմիջապես տեղափոխել են մոտակա հիվանդանոց, սակայն բժիշկները հայտնել են, որ տղան մահացել է։