Հարկային մուտքերն աճել են ավելի քան 314 միլիոն դոլարով․ ՊԵԿ

2025 թվականի հունվար-ապրիլ ամիսներին հարկային մուտքերն աճել են 120 միլիարդ դրամով (ավելի քան 314 միլիոն դոլար – խմբ.) կամ 14,5%-ով՝ նախորդ տարվա նույն ժամանակահատվածի համեմատ։ Այս մասին մայիսի 22-ին լրագրողների հետ հանդիպմանը հայտարարել է Հայաստանի պետական եկամուտների կոմիտեի նախագահ Էդուարդ Հակոբյանը։

Ըստ նրա, մուտքերն էականորեն աճել են թե՛ հարկային, թե՛ մաքսային համակարգերի գծով։ Նա պարզաբանել է, որ հարկային համակարգի գծով ցուցանիշն աճել է 12,7%-ով, իսկ մաքսային համակարգի գծով՝ 25,3%-ով։ Հակոբյանը մատնանշել է թե՛ հարկերի հավաքագրման, թե՛ տնտեսական աճի ապահովման կարևորությունը։

Պաշտոնյան վստահություն է հայտնել, որ վարչարարության և ստվերի դեմ պայքարի ոլորտում առաջընթաց է արձանագրվել։ Նա հավելել է, որ ՊԵԿ-ը վարչարարության վրա ծախսում է հարկային եկամուտների 1,1%-ը։