Հին մումիայի դաջվածքների առեղծվածը լուծված է

Հարավային Ամերիկայում գտնված կնոջ մումիայի դեմքի և դաստակի վրա հազվագյուտ դաջվածքներ են հայտնաբերվել: Այն թվագրվում է XIII–XIV դարերով։ Գտածոյի շնորհիվ գիտնականներն առաջին անգամ պարզել են՝ ինչից է պատրաստված եղել հին թանաքը։ Հետազոտությունը հրապարակվել է Journal of Cultural Heritage ամսագրում:

Թուրինի համալսարանի աշխատակիցները միանգամից երեք դաջվածք են հայտնաբերել, այդ թվում՝ դաստակի վրա հազիվ նկատելի T-աձև նշան: Բայց հիմնական հայտնագործությունը թանաքի բաղադրությունն է։ Ավանդական փայտածուխի փոխարեն, որը սովորաբար օգտագործվում էր հին աշխարհի դաջվածքներում, պիգմենտում հայտնաբերվել են պիրոքսենների խմբի մագնետիտի և սիլիկատների բյուրեղներ, ինչպիսինն է ավգիտը:

Սա առաջին նման հաստատումն Է Հարավային Ամերիկայում։ Վերլուծությունը ցույց է տվել, որ ներկը կարող էր ստացվել Պերուին բնորոշ բնական հանքանյութերից: Նման նյութերը կարող էին խորհրդանշել կարգավիճակը, համայնքին պատկանելը կամ ծիսական գործառույթ կատարելը: Հետազոտողները շեշտում են, որ մագնետիտի օգտագործումը և փայտածուխի բացակայությունը վկայում են գունանյութի գիտակցված ընտրության մասին: