Փաշինյանը փորձում էր Արևմուտքը հակադրել Ռուսաստանին. դա վտանգավոր է Հայաստանի համար. Մարկեդոնով (տեսանյութ)

Հայաստանի և Ռուսաստանի հարաբերությունները վերաֆորմատավորման կարիք չունեն, բայց միանշանակ կարիք ունեն առողջացման: Այս մասին Euromedia24-ի հետ հարցազրույցում նշեց ռուսաստանցի քաղաքագետ, ՄԳԻՄՕ-ի Միջազգային հետազոտությունների ինստիտուտի առաջատար գիտաշխատող, «Միջազգային վերլուծություն» ամսագրի գլխավոր խմբագիր Սերգեյ Մարկեդոնովը՝ խոսելով Ռուսաստանի Դաշնության արտգործնախարար Սերգեյ Լավրովի երևանյան այցի և հայ-ռուսական հարաբերությունների ընդհանուր վիճակի մասին:

Քաղաքագետի մեկնաբանությամբ՝ շրջադարձային կետը հայ-ռուսական հարաբերություններում 2022 թ. իրադարձություններն էին: Ըստ նրա՝ եթե չլիներ Ուկրաինայի պատերազմը, Ռուսաստանն ավելի ակտիվ կգործեր այս տարածաշրջանում:

«Հայաստանի ղեկավարությունը մի քանի սխալ և հապճեպ եզրակացություններ է արել Ռուսաստանի առնչությամբ՝ կարծելով, թե Ռուսաստանը հեռանում է Կովկասից: Կար այդպիսի պատկերացում, որ «վերջ, Ռուսաստանը հեռացող խաղացող է», ուստի պետք է կենտրոնանալ անվտանգության այլ «հովանավորների» վրա: Պետք չէ հապճեպ եզրակացություններ անել: Ե՛ւ Հայաստանն է պետք Ռուսաստանին, և ընդհակառակը՝ Ռուսաստանն է պետք Հայաստանին, մեր երկրներն ունեն ընդհանուր շահեր, դա ակնհայտ է», - նշեց ռուսաստանցի քաղաքագետը:

Այս համատեքստում Սերգեյ Մարկեդոնովը նաև անդրադարձավ Արցախում ռուսական խաղաղապահ առաքելության ձախողման հարցին՝ նշելով, որ եթե չլինեին ռուս խաղաղապահները, ավելի ծանր հետևանքներ կլինեին: Թեև, ըստ նրա, դա չի «փրկում» այն փաստից, որ հայերը կորցրեցին իրենց հողերը և ստիպված էին փախչել:

 «Երբ 2023 թվականին, դեռ մինչև սեպտեմբերյան իրադարձությունները, Հայաստանի ղեկավարն ասում է, որ «Ղարաբաղը ադրբեջանական հող է, մեր տարածքը 29,000 քառ. կմ է, մենք պետք է արագ թոթափենք այդ բեռը», երբ նա բացահայտ ասում է, որ «ղարաբաղցիներն են մեզ պատերազմի մեջ ներքաշել, մեզ սա պետք չէ, մենք պետք է դուրս գանք այս օրակարգից և կառուցենք խաղաղության օրակարգ», Ռուսաստանն, ի՞նչ է, պետք է ավելի հայ լինի, քան հայե՞րը: Դժվար թե: Սրանով մեծապես բացատրվում է Ռուսաստանի վարքագիծը», - մեկնաբանեց քաղաքագետը:

Մարկեդոնովի համոզմամբ՝ Արևմուտքը չի կարող փոխարինել Ռուսաստանին: Ըստ նրա՝ որքան էլ Ռուսաստանը թուլացած լինի, այնուամենայնիվ, Միացյալ Նահանգները և Եվրամիությունը չեն կարող դառնալ այլընտրանք Հայաստանի համար որպես անվտանգության երաշխավորներ: Սակայն դա, ըստ ՄԳԻՄՕ-ի առաջատար գիտաշխատողի, առիթ չէ, որպեսզի ինքը կամ ռուսաստանցի պաշտոնյաներն իրենց թույլ տան այնպիսի արտահայտություններ, ինչպես, օրինակ. «Ո՞ւր պիտի փախչեն հայերը, փախչելու տեղ չունեն»: Նա ընդգծեց, որ պետք է հարգել հայկական շահերը:

Մանրամասները՝ տեսանյութում:

Արամ Սարգսյան