Զախարովան Ռուսաստանի դրոշը պղծած վրացի երգչին անվանել է «անխելք»

Վրացի երգիչ Էրկելե Գեցաձեի գործողություններով, ով համերգի ժամանակ պղծել է Ռուսաստանի դրոշը, կզբաղվեն ՌԴ իրավապահ մարմինները։ Այս մասին իր տելեգրամյան ալիքում հայտարարել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան։ Այս մասին հաղորդում է  Gazeta.ru–ն։ 

Զախարովան ընդգծել է, որ «դրոշը կմնա դրոշ», անկախ նրանից, թե ինչ «կանի դրա հետ հոգեկան հիվանդը»։ Նրա խոսքով՝ այս արարքը աննկատ և առանց գնահատականի չի մնա ռուս իրավապահ մարմինների կողմից։

«Անձամբ իմ կողմից։ Երբ Աստված տղամարդուն ուղեղ չի տվել, նա ստիպված է լինում աշխատել այլ օրգաններով՝ այս դեպքում՝ հենց այն օրգանով, որը, ըստ երևույթին, ամենից հաճախ է ձեռքի տակ ընկնում», - գրել է Զախարովան։

Դիվանագետը հավելել է, որ շատ արժանի վրացիներ հպարտանում են ռուսական դրոշով և որպես օրինակ բերել է ճարտարապետ Զուրաբ Ծերեթելիին և բալետի պարող Նիկոլայ Ցիսկարիձեին։ Նա նաև հիշեցրել է, որ հենց վրացի Մելիտոն Կանտարիան էր՝ սերժանտ Միխայիլ Եգորովի հետ միասին, ովքեր տապալված Ռեյխստագի վրա բարձրացրին այն երկրի դրոշը, որի իրավահաջորդը Ռուսաստանն է։