Զելենսկին պատժամիջոցներ է սահմանել Կադիրովի օգնականի դեմ

Ուկրաինայի նախագահ Վլադիմիր Զելենսկին պատժամիջոցներ է սահմանել Չեչնիայի ղեկավար Ռամզան Կադիրովի օգնական Ահմեդ Դուդաևի և ևս ինը անձանց նկատմամբ։ Համապատասխան հրամանագիրը հրապարակվել է Ուկրաինայի նախագահի կայքում։

Պատժամիջոցների մեջ են մտնում «Մոտոր Սիչ»-ի նախկին ղեկավար Վյաչեսլավ Բոգուսլաևի որդին ՝ Ալեքսանդրը, Ռադայի նախկին պատգամավոր Իգոր Մոսիյչուկը , «Ճանապարհային վերահսկողության» ղեկավար Ռոստիսլավ Շապոշնիկովը, ինչպես նաև «PIN-UP» խաղատան սեփականատերեր Դմիտրի Պունինը, Իվան Բաննիկովը և Ալեքսանդր Մատյաշովը։ Նրանց նկատմամբ կկիրառվեն «անձնական հատուկ տնտեսական և այլ սահմանափակող միջոցառումներ (պատժամիջոցներ)»։

Պատժամիջոցներ են կիրառվել նաև Ուկրաինայի, Կիպրոսի և Նիդեռլանդների ինը ընկերությունների նկատմամբ, այդ թվում՝ կիպրոսյան մի ընկերության, որը տիրապետում է PIN-UP Guruflow Team Ltd առցանց խաղատան կառավարման կառուցվածքի 50%-ի բաժնետոմսերին։