Գերմանիան և Ուկրաինան կարտադրեն հեռահար հրթիռներ

Գերմանիայի նոր կանցլեր Ֆրիդրիխ Մերցը հայտարարել է, որ Ուկրաինան և Գերմանիան պատրաստվում են համատեղ արտադրել հեռահար հրթիռներ՝ առանց որևէ սահմանափակումների: Այս որոշումը կայացվել է Բեռլինում Ուկրաինայի նախագահ Վլադիմիր Զելենսկու հետ հանդիպման ընթացքում, որտեղ կողմերը քննարկել են ռազմական համագործակցությունը և նոր արտադրական հնարավորությունները:

 

Մերցը նշել է, որ Եվրոպան կշարունակի ճնշում գործադրել Ռուսաստանի վրա՝ Ուկրաինայի վրա հարձակումը դադարեցնելու նպատակով, իսկ Զելենսկին ընդգծել է, որ արդեն իսկ ստորագրվել են Ուկրաինայում ռազմական արտադրության ընդլայնման մասին համաձայնագրեր: Զելենսկին հավելել է, որ որոշ գործընկերներ աջակցել են Ուկրաինայի մասնակցությանը ՆԱՏՕ-ի գագաթնաժողովին՝ ընդգծելով, որ բացակայությունը կնշանակի ոչ թե Ուկրաինայի պարտություն, այլ ՆԱՏՕ-ի։

 

Նախորդ բանակցությունների ձախողումից և ռուսական կողմից զանգվածային օդային հարձակումներից հետո այս նոր համագործակցությունը կարող է Ուկրաինային և Գերմանիային հնարավորություն տալ ուժեղացնել պաշտպանունակությունը՝ հատկապես Ռուսաստանի հետ ռազմական հակամարտության պայմաններում, հայտնում է  Reuters-ը: