Օբամայի գլխավոր մրցակիցը կոչ է արել հրաժարվել թալիբների հետ բանակցություններից

Մասաչուսեթսի նախկին նահանգապետ Միթ Ռումնին ով Հանրապետական կուսակցությունից պայքարում է ԱՄՆ–ի նախագահի պաշտոնի համար, հայտարարել է, որ Միացյալ նահանգները չպետք է բանակցություններ վարի «Թալիբան» գրոհայինների հետ։ Ռումնին նման հայտարարություն է արել նախօրեին Հարավային Կարոլինայում ԱՄՆ–ի նախագահի հանրապետական թեկնածուների համատեղ դեբատի ժամանակ։

«Մենք չպետք է բանակցություններ սկսենք թալիբների հետ, այլ պետք է հաղթենք նրանց», – ասել է Ռումնին՝ ավելացնելով, որ «Թալիբան» շարժումը պատերազմ է հայտարարել Ամերիկայի դեմ և սպանել է ամերիկացի զինվորներին»։ Նախկին նահանգապետը նշել է, որ փոխնախագահ Ջոզեֆ Բայդենը չափազանց սխալվում է, որ թալիբներին չի համարում ԱՄՆ–ի թշնամին։ Հանդիսատեսը ծափերով ողջունել է Ռումնիի հայտարարությունը։ Հաղորդում է «The Washington Post»-ը։

Հիշեցնենք, որ ավելի վաղ ամերիկյան լրատվամիջոցները հայտարարել էին, որ Օբամայի վարչակազմը «Թալիբան» շարժման հետ գաղտնի պայմանավորվածություններ է ձեռք բերել՝ բանակցություններ սկսելու և երկկողմ հակամարտությունը կարգավորելու վերաբերյալ։ Սակայն ԱՄՆ–ի պետքարտուղար Հիլարի Քլինթոնը 2011 թ–ի հոկտեմբերին Աֆղանստան այցելության ժամանակ հայտարարել էր, որ եթե թալիբները բանակցություններ չսկսեն ԱՄՆ–ի հետ, ապա հակամարտությունը նրանց հետ կշարունակվի։