Թուրքիայում ակցիա է իրականացվել Մեծամորի ատոմակայանի փակման պահանջով

Հունիսի 1-ին Թուրքիայում թվով 33 շրջակա միջավայրի և մարդու իրավունքների կազմակերպություններ Իգդիրում ակցիա են իրականացրել, որտեղ հանդես են եկել Մեծամորի ատոմային էլեկտրակայանի ԱԷԿ փակման կոչով։ Այս մասին հայտնում է Էրմենիհաբերը:

Ակցիայի մասնակիցները նշել են, թե իբր Հայաստանում Մեծամորի ԱԷԿ-ը, «չնայած շահագործման ժամկետը լրանում է 2025-ին», դեռևս ակտիվ գործում է։

Մերսինի բնության և շրջակա միջավայրի ասոցիացիայի նախագահ Սաբահաթ Ասլանը հանդես է եկել հետևյալ հայտարարությամբ։

«Մեծամորի ԱԷԿ-ն այսօր աշխարհում առկա կայանների մեջ ամենառիսկային տեխնոլոգիան ունի։ Այդ կայանը հատկապես մեր Իգդիրի նահանգի շրջակա միջավայրին և մարդկային առողջության վրա շատ բացասական է ազդում։ Դիմում ենք ԱԷԿ-ներով զբաղվող բոլոր միջազգային կառույցներին և Հայաստանի կառավարությանը․ Փակե՛ք Մեծամորի ԱԷԿ-ը, քանի դեռ Հայաստանը չի դարձել Չեռնոբիլ և Ֆուկուշիմա։ Այս կայանի փակման համար մեր երկրի համապատասխան մարմիններն անհապաղ պետք է գործի անցնեն։ Մեր պայքարը շարունակվելու է, քանի դեռ Մեծամորի ԱԷԿ-ը չի փակվել»։

Հարկ է նշել, որ Թուրքիան մշտապես հանդես է գալիս Մեծամորի ատոմակայանի փակման կոչերով, պատճառաբանելով, թե իբր այն «սպառնալիք» է հանդիսանում  ոչ միայն Թուրքիայի, այլ նաև ամբողջ տարածաշրջանի համար։