ԵՄ-ն մեկնաբանել է Ռուսաստանի և Ուկրաինայի միջև բանակցությունների երկրորդ փուլը

Եվրամիությունն աջակցում է Ուկրաինայում խաղաղության հասնելու դիվանագիտական ​​ջանքերին։ Այս մասին Բրյուսելում կայացած ճեպազրույցում հայտարարել է Միության արտաքին քաղաքականության ծառայության ներկայացուցիչ Անվար ալ Անունին, փոխանցում է ՌԻԱ Նովոստին։

«Ինչ վերաբերում է Ստամբուլում կայանալիք հանդիպմանը, ինչպես ասվել է ավելի վաղ, Եվրամիությունն աջակցում է դիվանագիտական ​​ջանքերին՝ Ուկրաինայում արդար, համապարփակ և կայուն խաղաղության հասնելու համար», - ասել է նա՝ պատասխանելով Ստամբուլում ռուս-ուկրաինական բանակցությունները մեկնաբանելու խնդրանքին։

Ռուսաստանի և Ուկրաինայի պատվիրակություններն արդեն ժամանել են Չիրագան պալատ, որտեղ տեղի կունենա բանակցությունների երկրորդ փուլը։ Նախ բացման խոսքով հանդես կգա Թուրքիայի արտգործնախարար Հաքան Ֆիդանը, ապա կսկսվի քննարկումը հակամարտության դադարեցման պայմանների շուրջ։

Կողմերը պետք է քննարկեն միմյանց հուշագրերը։