Մեծ Բրիտանիան Ուկրաինային 100 000 անօդաչու թռչող սարք կմատակարարի

Մեծ Բրիտանիան մինչև 2026 թվականի ապրիլը 100 000 անօդաչու թռչող սարք կփոխանցի Ուկրաինային՝ որպես ռազմական օգնության նոր փաթեթի մաս։ Այս մասին Reuters-ին հայտնել են բրիտանական կառավարությունից։

Նշվում է, որ համապատասխան խոստումը Կիևին տրվել է հունիսի 4-ին։ Հոդվածում ասվում է, որ 100 000 անօդաչու թռչող սարքը տասն անգամ ավելի է, քան մատակարարումների նախորդ ծավալը։

Նախաձեռնության իրականացման համար կհատկացվի 350 մլն ֆունտ (473 մլն դոլար): Անօդաչու սարքերի առաքումն իրականացվում է Ուկրաինային 4,5 միլիարդ ֆունտ արժողությամբ ռազմական օգնության փաթեթի շրջանակներում։