ՆԱՏՕ-ն ավելի շատ մտահոգված է իր պառակտմամբ, քան Ուկրաինայով․ փորձագետ

Հունիսին կայանալիք ՆԱՏՕ-ի գագաթնաժողովը մեծ ուշադրություն չի դարձնի Ուկրաինային, քանի որ դաշինքն այժմ ավելի շատ մտահոգված է սեփական պառակտման հաղթահարմամբ, ՌԻԱ Նովոստիին ասել է փորձագետ Սերգեյ Երմակովը։

ՆԱՏՕ-ի գագաթնաժողովը տեղի կունենա հունիսի 24-25-ը՝ Հաագայում։

Ավելի վաղ France Presse գործակալությունը, հղում անելով անանուն դիվանագետին, հայտնել էր, որ ՆԱՏՕ-ն ձգտում է հունիսին Հաագայում կայանալիք գագաթնաժողովի վերջնական հայտարարությունը հակիրճ դարձնել և խուսափել Ուկրաինայի հնարավոր անդամակցության մասին հիշատակելուց՝ տարաձայնություններ չստեղծելու համար։

Գործակալության տվյալներով՝ Հաագայում ՆԱՏՕ-ի գագաթնաժողովի հիմնական շեշտը դրվելու է ոչ թե Ուկրաինայի վրա, այլ դաշինքի անդամ երկրների միջև պաշտպանական ծախսերի ավելացման շուրջ համաձայնության հասնելու վրա, որը կբավարարի ԱՄՆ նախագահ Դոնալդ Թրամփին։

«Հիմա ՆԱՏՕ-ի գլխավոր քարտուղար Ռյուտեի առաջնահերթությունները բոլորովին այլ են՝ ոչ թե Ուկրաինան, այլ բուն դաշինքի պահպանումը։ Ամենակարևորը անդրատլանտյան կապերի ամրապնդումն է, այսինքն՝ ԱՄՆ-ի մասնակցությունը ՆԱՏՕ-ին, որն, ըստ էության, այս կազմակերպության հենասյունն է։ Ուստի, նրանց համար ամենակարևորը կլինի տխրահռչակ, արդար, այսպես ասած, ֆինանսական ծախսերի բեռի բաշխման քննարկումը»,- ասել է Երմակովը։