ՆԱՏՕ-ի երկրները կարող են համաձայնել ավելացնել դաշինքի համար նախատեսված ծախսերը

ՆԱՏՕ-ի երկրները կկարողանան պայմանավորվել ռազմական ծախսերը ՀՆԱ-ի 5%-ին հասցնելու պարտավորության շուրջ՝ նախքան Հաագայում դաշինքի գագաթնաժողովը, որը կանցկացվի հունիսի 24-25-ը։ Այս մասին Բրյուսելում ՆԱՏՕ-ի պաշտպանության նախարարների հանդիպմանը ժամանելուն պես հայտարարել է ԱՄՆ պաշտպանության նախարար Փիթ Հեգսեթը, փոխանցում է ՏԱՍՍ-ը։

«Մենք հավաքվել ենք այստեղ՝ շարունակելու ԱՄՆ նախագահ Դոնալդ Թրամփի սկսած աշխատանքը, որը վերաբերում է ՆԱՏՕ-ի բոլոր երկրների՝ պաշտպանությանը ՀՆԱ-ի 5%-ը հատկացնելու պարտավորությանը, ինչի շուրջ, կարծում ենք, կարելի է համաձայնեցնել: Դա պետք է տեղի ունենա Հաագայի գագաթնաժողովում»,- ասել է նա։

Նախօրեին ՆԱՏՕ-ի գլխավոր քարտուղար Մարկ Ռյուտեն ասել էր, որ Հաագայում Հյուսիսատլանտյան դաշինքի գագաթնաժողովի գլխավոր թեման լինելու է կազմակերպության անդամ երկրների պաշտպանության ոլորտում ներդրումների զգալի աճը։