Մոսկվայում կանցկացվեն Թումանյանական օրեր

Հունիսի 8-ին Մոսկվայում կմեկնարկեն թումանյանական օրերը՝ նվիրված Ամենայն հայոց բանաստեղծ Հովհաննես Թումանյանի ծննդյան 156-ամյակի առթիվ:

Մշակութային օրերը կանցկացվեն ՌԴ-ում Հայաստանի դեսպանատան մշակութային կենտրոնում Լազարևի անվան կրթական և մշակութային նախաձեռնությունների հիմնադրամի և Հովհաննես Թումանյանի երևանյան թանգարանի աջակցությամբ։

Ծրագրի նպատակն է Ռուսաստանում հանրահռչակել հայ ականավոր գրող Հովհաննես Թումանյանի մշակութային ժառանգությունն ու հոգևոր արժեքները։

Հունիսի 8-ի ծրագիրը ներառում է «Թափառող հոգի» ցուցահանդեսը՝ նվիրված հայ ականավոր գրողի կյանքին և ստեղծագործությանը, և Թումանյանի թանգարանի ֆոնդերի գլխավոր պահապան Մարինե Բաղդասարյանի «Թումանյանը և ռուսական գրականությունը» դասախոսությունը։

Հովհաննես Թումանյանի թանգարանի հաղորդմամբ, հունիսի 8-9-ին ՌԴ-ում ՀՀ դեսպանատան և Ռուսաստանի հայերի միության համագործակցությամբ, տեղի են ունենալու մշակութային միջոցառումներ՝ նվիրված Հովհաննես Թումանյանին։ Միջոցառումները կանցկացվեն «Թումանյանը երեխաների համար» ծրագրի զուգահեռ անցկացմամբ, որտեղ փոքրիկները կվայելեն անիմացիաներ, մուլտֆիլմեր և խաղեր։

Հունիսի 9-ին «Լուսարձակ» կիրակնօրյա դպրոցում կլինի բանախոսություն, ֆիլմի դիտում, զուգահեռ՝ Թումանյանը երեխաների համար (անիմացիաներ, մուլտֆիլմեր, խաղեր)։