Հրանտ Դինքին սպանողը ցմահ ազատազրկման է դատապարտվել

Այսօր՝ Հրանտ Դինքի սպանության հինգերորդ տարելիցից երկու օր առաջ, Ստամբուլի առաջին ատյանի 14-րդ դատարանը ցմահ ազատազրկման է դատապարտել «Ակօսի» խմբագրապետի գործով գլխավոր մեղադրյալ Յասին Հայալին։

Թուրքական «Today’s Zaman» պարբերականը հաղորդում է, որ գործով մյուս մեղադրյալ Էրհան Թունջելն արդարացվել է Դինքի սպանության գործով, սակայն մեղավոր է ճանաչվել 2004թ. Ստամբուլի «McDonalds’»-ի պայթյունի կազմակերպմանը մասնակցության համար և դատապարտվել 10 տարվա ազատազրկման։

«Հինգ տարի տևած դատական գործընթացի ընթացքում նրանց ծիծաղեցին մեզ վրա։ Մենք չէինք սպասում, որ նրանք ամենամեծ կատակը կթողնեին վերջին պահի համար»,- մեղադրական եզրակացության հրապարակումից հետո Դինքի ընտանիքի փաստաբան Ֆեթհիե Չեթինը հայտարարել է, որ «քաղաքական դրդապատճառներով սպանությունների պետական ավանդույթն» անփոփոխ է մնում, քանի որ դատարանի եզրակացության մեջ որևէ խոսք չի եղել Դինքի սպանության մեջ պետության ներգրավվածության մասին։

Չեթինը վստահեցրել է, որ առաջին ատյանի դատարանի վճիռը Դինքի գործի առաջին փուլն է ընդամենը, և ինքը պատրաստվում է օգտվել բոլոր հնարավոր միջոցներից՝ ընդդեմ դատարանի վճռի։ Փաստաբանն ասել է, որ այդ վճռով շարունակվում է պետության խտրականությունն իր որոշ քաղաքացիների նկատմամբ՝ նրանց վերածելով թշնամիների։