Թուրքիան ճնշում է գործադրում Ադրբեջանի վրա․ ի՞նչ է խոստացել Բաքուն Իսրայելին

Իսրայելը կշարունակի գնել ադրբեջանական նավթ, չնայած դա չի արտացոլվում պաշտոնական վիճակագրության մեջ, հաղորդում է «Haaretz» թերթը՝ հղում անելով Իսրայելի կառավարության աղբյուրին։

Հիշեցնենք, որ Ադրբեջանի պետական ​​մաքսային կոմիտեն վերջերս հրապարակել է 2025 թվականի առաջին եռամսյակին արտաքին առևտրի վերաբերյալ զեկույց: Այս փաստաթղթում Իսրայելը չի ​​հիշատակվում Ադրբեջանից նավթ գնող երկրների շարքում։

Միևնույն ժամանակ, հայտնի է, որ Իսրայելը ադրբեջանական նավթի հիմնական գնորդներից մեկն է: Ավանդաբար, երկրի նավթային կարիքների մոտ 40 տոկոսը բավարարվել է Ադրբեջանից մատակարարումների միջոցով: Այս համատեքստում պետական ​​մաքսային կոմիտեի զեկույցը հարցեր է առաջացրել. արդյո՞ք Բաքուն դադարեցրել է նավթի վաճառքը Թել Ավիվին՝ Գազայում շարունակվող պատերազմի և Թուրքիայի կողմից բողոքի ֆոնին: Իսրայելի կառավարության աղբյուրները պնդում են, որ գնումները շարունակվում են։

«Ադրբեջանը խոստացել է Իսրայելին, որ կշարունակի նավթի մատակարարումները, չնայած այն հանգամանքին, որ այլևս պաշտոնապես չի նշում Իսրայել նավթի արտահանման փաստը», - ասել է իսրայելցի պաշտոնյան։

Իսրայելի կառավարության աղբյուրները նախկինում հայտնել էին, որ Իսրայելը իր մաքսային վիճակագրության մեջ չի բացահայտում այն ​​մուսուլմանական երկրների անունները, որոնցից նավթ է գնում: Սակայն, շատ դեպքերում, այդ երկրներն իրենք են հրապարակում նման տվյալներ, ինչը հանգեցնում է սկանդալների: