ՌԴ ԱԳՆ-ն պատասխանել է Լավրովի և Ռուբիոյի նոր հանդիպման մասին հարցին

ՌԴ ԱԳ նախարար Սերգեյ Լավրովի և ԱՄՆ պետքարտուղար Մարկո Ռուբիոյի դեմ առ դեմ նոր հանդիպումը կախված է երկու երկրների նախագահների որոշումից և քննարկվող թեմաների արդիականությունից։ Այս մասին ՏԱՍՍ-ին տված հարցազրույցում հայտնել է փոխարտգործնախարար Սերգեյ Ռյաբկովը։

Նրա խոսքով՝ Վաշինգտոնը հասկանում է երկու պետությունների ներկայացուցիչների միջև շփումների անհրաժեշտությունը։

Նույն հարցազրույցում դիվանագետն ասել է, որ արտաքին քաղաքական գերատեսչությունների ղեկավարները մշտական ​​կապի մեջ են։ Բացի այդ, նրանք արդեն 7 հեռախոսազրույց են անցկացրել և անձամբ  Ռիադում հանդիպել փետրվարին։ Ռյաբկովը նշել է, որ Լավրովի և Ռուբիոյի շփումը կապված է Ուկրաինայի և հակամարտության կարգավորման ուղիների որոնման հետ, որն արտացոլված է երկկողմ օրակարգում գրեթե բոլոր մակարդակներում։

Մայիսի վերջին Լավրովն ասել էր, որ Ռուսաստանը պատրանքներ չունի ԱՄՆ-ի հետ հարաբերություններում և ենթադրում է, որ Վաշինգտոնը կարող է արմատապես փոխել իր դիրքորոշումը։ Սակայն, նրա կարծիքով, ռուս-ամերիկյան ներկայիս հարաբերությունները կարելի է բնութագրել՝ որպես «վերադարձ դեպի նորմալացում»։