Թուրքիայում կարող է Ուկրաինայի հարցով առաջնորդների գագաթնաժողով անցկացվել

Թուրքիան կշարունակի ջանքերը ռուս-ուկրաինական հակամարտությունը լուծելու նպատակով երկրների ղեկավարների մակարդակով գագաթնաժողով կազմակերպելու համար, սակայն դրան պետք է նախորդեն կոնկրետ զարգացումներ ու պայմանավորվածություններ։ Այս մասին հայտնում է РИА Новости-ն՝ թուրքական դիվանագիտական ​​աղբյուրին հղումով։

«Իհարկե, թուրքական կողմի ջանքերն այս ուղղությամբ կշարունակվեն, բայց գագաթնաժողովը պահանջում է որոշակի զարգացումներ, պայմանավորվածություններ, որոնք արդեն ներկայացվել են առաջնորդների մակարդակով քննարկման»,- ասել է նա։

Հունիսի 2-ին Թուրքիայում անցկացվել է Ռուսաստանի և Ուկրաինայի միջև բանակցությունների երկրորդ փուլը։ Դրա ընթացքում կողմերը փոխանակել են հրադադարի պայմանների վերաբերյալ հուշագրի իրենց տարբերակները։

Դրանից հետո Թուրքիայի նախագահ Ռեջեփ Թայիփ Էրդողանը հայտարարել է, որ ցանկանում է Ստամբուլում կամ Անկարայում ղեկավարների մակարդակով գագաթնաժողով կազմակերպել՝ Ռուսաստանի, ԱՄՆ-ի և Ուկրաինայի նախագահներ Վլադիմիր Պուտինի, Դոնալդ Թրամփի և Վլադիմիր Զելենսկու մասնակցությամբ։