Ուկրաինայի հակամարտության զարգացումը ԱՄՆ-ի հետ հարաբերությունների թեստ կլինի․ ՌԴ ԱԳՆ

Ռուս-ուկրաինական հակամարտությունը փորձություն է ԱՄՆ-ի համար, որը ստուգում է ԱՄՆ վարչակազմի լրջությունը Դոնալդ Թրամփի՝ Ռուսաստանի հետ հարաբերությունները բարելավելու մտադրության մասին։ Այս մասին ՏԱՍՍ-ին տված հարցազրույցում ասել է ՌԴ փոխարտգործնախարար Սերգեյ Ռյաբկովը։

«Վաշինգտոնի և Մոսկվայի միջև լայնածավալ և կառուցողական երկխոսությունը վերսկսելու համար, ներառյալ սպառազինությունների վերահսկման հարցը, անհրաժեշտ է վստահելի ընդհանուր քաղաքական կամ ռազմաքաղաքական հիմք»,-նշել է Ռյաբկովը։

Նա ընդգծել է, որ կարգավորման միակ տարրը պետք է լինի ԱՄՆ-ի պատրաստակամությունը՝ փաստացի հարգանք ցուցաբերելու Ռուսաստանի հիմնարար շահերի նկատմամբ։

«Հաշվի առնելով ԱՄՆ նախորդ իշխանությունների և, ընդհանրապես, Արևմուտքի կողմից հրահրված ուկրաինական ճգնաժամի բնույթն ու ծագումը, այս հակամարտությունը, բնականաբար, հանդես է գալիս՝ որպես փորձություն, որը ստուգում է Վաշինգտոնի՝ հարաբերությունները բարելավելու մտադրության լրջությունը»,- ասել է ՌԴ փոխարտգործնախարարը։