ՌԴ-ում առաջարկել են բազմազավակ ծնող համարվելու շեմը բարձրացնել՝ մինչև 4 երեխա

Ռուսաստանի երեխաների իրավունքների պաշտպան Մարիա Լվովա-Բելովան առաջարկել է մինչև 2050 թ․ բազմազավակ ընտանիք համարել ոչ թե 3, այլ 4 և ավելի երեխաներ ունեցողներին։ Նրա խոսքով՝ երեք երեխա ունենալը կենցաղային նորմ է, իսկ չորս և ավելի երեխաները՝ արդեն մարտահրավեր։ Նա ընդգծել է, որ պետությունը պետք է ապահովի հավելյալ սոցիալական և հարկային աջակցություն՝ նման ընտանիքների ֆինանսական կայունության համար։

Նախաձեռնությունն արժանացել է քննադատության Պետդումայի պատգամավոր Նինա Օստանինայի կողմից։ Նրա կարծիքով՝ նման առաջարկը կարող է վախեցնել այն ընտանիքներին, որոնք պատրաստվում են ունենալ երրորդ երեխա, և ընդհակառակը՝ նպաստելու փոխարեն կարող է դառնալ ժողովրդագրական խոչընդոտ, փոխանցում է Лента.ру-ն։

Ներկայումս Ռուսաստանում բազմազավակ է համարվում երեք և ավելի երեխա ունեցող ընտանիքը։ Այդ կարգավիճակը տրվում է նաև որդեգրված երեխաների դեպքում՝ ապահովելով արտոնություններ՝ հարկային զեղչերից մինչև հիփոթեքի փոխհատուցում։ Ըստ պաշտոնական տվյալների՝ երկրում գրանցված է շուրջ 2,4 միլիոն նման ընտանիք։